.jpg)
Ji bo ku ez peyvên li hemberî “sinsi”ya tirkî û “xebis” a erebî bibînim ez zêde negeriyam, ji “ava bin kayê” çêtir tune. Encex ji ziyana wê ava bin kayê bêhtir, kesên ku wê nabînin min diêşînin.
Gelo bi rastî kurdên bakur nêta Ahmed Altan û Tayyip Erdogan fam nakin? Eger rast be, wê demê 30 salên din jî têkoşîn lazim e ku kurd dostên xwe nas bikin. Dawud careke din xêrhatina min a Diyarnameyê kir, min jî jê re got, ezê êdî li ser siyasetê binivîsînim, ma Ahmet Altan rojnamegeriyê dike, na. Wê demê ezê jî ne huner û çandê, siyasetê bikim...
Ev reaksiyonek e helbet.
Min di nivîsa xwe ya vê hefteyê ya di Rûdawê de hevokek wiha bikaranî: “Exlaqê Ahmet Altan ê rojnamegeriyê wekî yê R.T. Erdogan yê siyasetê ye.” Bi rastî jî pir nêzî hev in. Erdogan, vexwendina vegera Tirkiyeyê li Ciwan Haco dike. Tirr li ku das li ku... Ahmet Altan jî bi rojan pesnê “peyvên watedar”ê hunermendekî kurd dide. Gelo çend gotina bi kurdî dizane? Wê ji Mehmet Metiner çi qasî fêrî kurdi bibe?.
Ferqa di nav bera A. Altan, Taraf û yên din de tenê, ew kurdan înkar nakin, lê koletiyê ferz dikin. R.T.Erogan û AKP jî kurdan dibînin, lê ji bo ku neyên dîtin bi her awayî komkujiyan pêk tînin. Ahmet Altan û Tarafa wî şûjina çavên xwe nabînin, lê derziya çavê xelkê dibînin. Zarokên ku li başûr bi bombeyên “kevokên” Altan tên kuştin, li gorî wî ew “îdîa ye”, li gorî Erdogan û cemaeta wî jî gerîlla wan wek “mertalên zindî” bi kar tîne.
Kurdên ku vê rojê bi R. T. Erdogan tînin, li cihekî pir şimatok sekinîne, her gav dikarin bişemitin. R.T.Erdogan bawer dike ku wê kurdan bi komkujiyên reş û spî biqedîne, çend kurdên rizyayî jî mabin, wê bibin mirîdên wî ku niha jî wiha ne. Ya kambax ew e, ku çend rizyayî di çapemeniyê de, bi baweriya Erdogan bawer dikin. Serokatiya wan rizyayiyan jî Ahmet Altan dike. Altan wekî Erdogan e, yan jî yek in, yek “siyasî-leşkerî” yê din jî “rojnamegerî” kirine rê. Seddam Husên yekemîn kes e ku îtîraf bi kurdan kir û mafê otonomî da wan, lê ji her kesî bêhtir wî kurd kuştin. Tayyip her wekî Seddam, lê hinekî guhertî bi ser kurdan de diçe. Sedemên wê guhertinê jî ew e, ku Tirkiye ne Iraq e.
Ne tenê kurdan niyetên Erdogan fam kirine, birçiyên Somaliyê jî dizanin ku ew pariyê ku davêje ber wan, ne ji xêrê re ye, lê hîn hinek “rojnamegirên kurd” hene ku bûne mirûdê Melle Teyyip.
Ahmet Altan û Mele Tayyip du cihokên avê yên cuda, di bin bêndereke kayê de ne. Wey li wan be yên ku li ser wê kayê rûnên.
.jpg)
.jpg)
