Di 'Diyarê Me' de gelek caran me danberhev çêkiribûn. Îro em danberhevek din raste rast pêşkêş dikin bê şirove, nirxandinan. De fermo em bi hev re bixwînin:
Dîroka desthilatdariya herduyan
- Ji sala 2002'yan ve AKP û Erdogan (yanê 14 sal in) Tirkiyeyê bi rê ve dibe
Em berî 2003'yan nehesibînin, ji wê rojê ve Barzanî Başûr bi rê ve dibe. (Partiyên din jî hene lê ji ber bi dengên xwe yekemîn e em Barzanî dibêjin, di vê nivîsê de jî dê wisa bê bikaranîn)
Em dikarin wisa jî bibêjin, Erdogan ji sala 94’an ve Tirkiyeyê (yên Stenbolê bi rê ve bibe wekî ku Tirkiyeyê bi rê ve dibe tê hesibandin li Tirkiyeyê) bi rê ve dibe, Barzanî ji sala 92’yan ve. Yanê desthilatdariya herduyan hema hema ji aliyê salan ve yek e.
- Heta berî çeteyên DAIŞ'ê êrîşê Misûl û dûre Mexmûrê bikin li Başûr her diçû hejmara MALL'an (Li vir AVM dibêjin) zêde dibû.
Li Stenbolê her diçe hejmara AVM'yan zêde dibe bêyî ku pêdivî bi ew qas AVM'yan hebe (li gor îstatîstîkan û pêdiviya nifûsa gel a bi tiştek wisa…)
Çandinî
- Li Başûr erd ji bo çandiniyê guncan e lê çandinî nayê kirin, li Tirkiyeyê jî erd guncan e lê bi têra xwe nayê kirin, polîtîkaya çandiniyê bi têra xwe pêş ve nayê birin.
- Li Başûr genim jî, birinc û tiştên din ên çandiniyê jî ji derve dikirin.
Li Tirkiyeyê jî beşek ji genimê tê bikaranîn ji derve tê kirîn. Li Tirkiyeyê di sala 2004'an de 93 mîlyon donim erd ji bo ajotina genim dihat bikaranîn, di sala 2014'an de ev katiye 77 mîlyon donim î. (1)
Perwerdehî
- Li Tirkiyeyê malbat tenê sedî 2'yê butçeya xwe ji bo perwerdehiyê vediqetîne (Li gelek welatên Ewropayê, welatên pêşketî yên dinyayê ev bi ser sedî dehî re ye) (2)
Li Başûr jî rewş ji vê ne baştir e.
- Li Tirkiyeyê gel zêde li rêzefîlman hez dike, li Başûr jî.
Aborî
- Li Tirkiyeyê her çiqas Bankeya Navendî (ku saziyek serbixwe ye) û beşên din ên aboriyê hebin jî hikumet çi bibêje aborî li gor wê şikil digire.
Li Başûr jî bi heman awayî. Bêyî gotina hikumetê kes nikare karek mezin bike; di karên mezin de miheqek şirîkek jê ji malbata Barzaniyan e.
- Li Başûr tu nêzî Barzaniyan bî, yan têkiliyên te yên xurt bi wan re hebin her cure kar tu dikarî bikî.
Li Tirkiyeyê tu nêzî hikumetê bî rewş bi heman awayî ye, hemû derî ji bo te vedibin.
- Li Tirkiyeyê li gor Zagona Bingehîn (xala 160’î) “Sayiştaş” li ser navê Meclisê aboriyê, pereyên di saziyên fermî de, hikumet û rêveberiyên herêmî de têne xerckirin dişopîne û her sal raporê dide Meclisê. Lê ev du sal in Meclis nizane çi ji bo ku derê tê xerc kirin ji ber ku Sayiştaş raporan nade.
Li Başûr jî wisa ye ku kes nizane pereyên ku ji Petrolê tên, pereyên ku ji gumrikên deriyên sînor tên diçin ku derê.
Serokên her du aliyan
- Li Tirkiyeyê Serokomar Birêz Recep Tayyip Erdogan dibêje, "Ez ne mecbûr im tevlî biryara Dadgeha Zagona Bingehîn bibim, ez vê biryara wê qebûl nakim", "Pergala parlementerî di odeyê de rawestandiye" û her wiha li gor îdîayên muxalefetê, Erdogan li gor Zagona Bingehîn tevnagere, gere serokomarekî bêalî be, lê aliyê partiya xwe digire, ev yek jî tê meseleya îhlalkirina Zagona Bingehîn.
Li Başûr jî Kek Mesûd Barzanî zagonê qebûl nake. Ji par ve serdema Serokatiya wî bi dawî bûye, divê hilbijartin çêbe lê ne çêdike, ne jî rê li ber vedike. Û bêyî zagonê serokatiya xwe didomîne.
Ji peywirê girtin
- Li Tirkiyeyê Ahmet Davutoglu hat hilbijartin (01.11.2015, bi sedî 40.8) û bi vî awayî careke din bû serokwezîr, lê bi gotineke Erdogan ji Serokwezîrî îstîfa kir.
Li Başûr Serokê Meclisê Yûsif Mihemed (Ji Goranê) ku hatibû hilbijartin ji Hewlêrê hat qewirandin. Nahêlin ew bikeve Hewlêrê jî.
- Li Tirkiyeyê hikumeta AKP'ê her xwe mexdûr nîşan dide û bi vî awayî mirovan ber bi xwe vedikişîne.
Li Başûr Barzanî bêyî gavan biavêje her qala serxwebûnê dike bi vê hêviyê mirovan ber bi xwe ve dikişîne. (Di 01.07.2014'an de yekem car Barzanî gotibû emê di nav çend mehan de ji bo serxwebûnê referandûmê çêbikin, 2 sal ser re derbas bûn hê tu gav neavêtiye...) (3)
- Li Tirkiyeyê hikumet bê sînor bi ser partiyên muxalif de diçe. Li Başûr jî bi vî awayî (mînak rewşa di navbera PDK û Goran de)
Çapemenî
- Li Tirkiyeyê bac ji bo TRT'ê dixibite, TRT jî ji bo hikumetê;
Li Başûr petrol ji bo kanalên Barzaniyan tê xecrkirin, ew kanal jî gotin û dîtinên wan derdixin pêş.
Û xala dawî: Jiyan
- Li her du aliyan jî mirov ji jiyanê ne mimnûn in. Serê vê mehê nûçe hate nivîsandin ku hemwelatiyên Tirkiyeyê di asta rekorê de ji bo penaberiya siyasî serî li Almanyayê dane. (4) Yanê xelk ji jiyanê ne memnûn e û dixwaze bireve. Ev daneyên Almanyayê ne, rewşa li welatên din jî ne ji vê cudatir e.
Li Başûr jî mirov ji jiyana xwe ne memnûn in, bi taybetî ciwan her çav li derve ne.
- Rewşa zarokên rêveberên Tirkiyeyê her baş e, ji aliyê aborî de jî tiştên din de jî; lê zarokên ku di pevçûnan de dimirin dema cenazeyên wan radikin diyar e her zarokên ferîqar in; xaniyên dê û bavên wan vê yekê baş nîşan didin.
Li Başûr jî wisa ye, zarokên rêveberan her di kêf û sefayê de ne, lê pêşmergeyek dikare ji ber nikare nan bibe mal întîxar bike, yan pêşmergeyên din gazinan ji nedana meaşê bikin.
Belkî mirov dikare xalan zêdetir bike, lê ev yek bes in herhal ji bo dîtina rewşê…
Çavkanî:
1- http://www.disticaret.biz.tr/2016/01/turkiyenin-bugday-ithalati.html
2- http://diyarname.com/news.php?Idx=22685
3- http://www.bbc.com/news/world-middle-east-28103124
4- http://www.ntv.com.tr/dunya/turk-vatandaslarindan-almanyaya-rekor-iltica-basvurusu,GMjAAXBTA0W0TOVczUC1zA
.jpg)
.jpg)
.jpg)
