Ev demekê ye ez dixwazim vê nivîsê binivîsim. Ev nivîs bangeke ji bo hemû şaredarên kurd e yên ku li kêleka Çemê Dîcle şaredariyê dikin.
Pêşî agahî:
Li bajarên kurd cihê ku zarok, ciwan, mezin bikevinê, têde soberî (melevanî) bikin û xwe têde hênik bikin kêm cih hene. Yek ji wan deran jî Çemê Dîcle ye. Her kesê li der û dora vî çemî dijî, nêzî vî çemî cih û war e ji vî çemî hez dike.
Ez bi xwe jî gelek caran ketime vî çemî.
Ev çemê ku hin cihan teng dibe û ava wê bi şid diherike. Hin cihan fireh dibe ava wê encax digihîje gozika mirov. Her kesê ku ketibe vî çemî dizane û jê hez dike ku li cihê teng çi qas xweş e mirov xwe berdê û av mirov biherikîne heta cihê sekan bibe. Min bi xwe jî wisa kiriye. Ez niha herim ezê dîsa wisa bikim.
Ev çemê ku em ew qas jê hez dikin di heman demê de bi kêmînan, bi gerînekan tije ye. Ger hûn rastî wê gerînekê hatin felat zehmet e.
Û ji ber van yekan her sal gelek kes di Çemê Dîcleyê de difetisin, jiyana xwe ji dest didin. Xebera herî dawî roja 14.08.2009'an de hat. Xwendekarekî bi navê Firyal Cebe (27 salî) li Kerborana Mêrdînê dema ket Çemê Dîcleyê fetisî. Çend roj berê li Batmanê jî xebereke wisa hatibû.
Ez nizanim îsal ew çendemîn kes e ku di Çemê Dîcleyê de difetise. Û her sal bi vî rengî çêdibe.
Em nikarin ketina Çemê Dîcleyê qedexe bikin, tişteke wisa ne mimkûn e.
Lewma daxwaza min, pêşniyara min ev e ji şaredarên kurd:
Gelo ew nikarin bên ba hev, biryarekê bigirin, ji serî heta dawî li ser Çemê Dîcleyê lêkolîneke bikin, ku derê wê bi talûke ye, ku der guncan e ji bo ketina çem, ku der bi xeter e ku divê kes nekevê û wan deran diyar bikin?
Gelo nikarin van cihan diyar bikin û li cihên ku bi talûke ne tabelayan biçikînin?
A rast ez ne pispor im, ez nizanim di vî warî de tişteke wisa mimkûn e yan na lê a min wekî kurdek, wekî mirovek ez gelek pê diêşim ciwan di nav çemê ku jê hez dikin de jiyana xwe ji dest didin.
Û ber vê êşê jî tenê ev yek hate bîra min.
Wekî din tişteke ku bê kirin, pêşniyareke din nehate bîra min.
Pêşniyareke din hebe, em dikarin wê jî biweşînin, wê jî ragihînin şaredarên xwe.
.jpg)
.jpg)
