WAN

Hevserokê HDP'ê Selahattin Demîrtaş îro di mîtînga li Wanê de bû. 

Vane ji gotinên wî hin not:

- Çûyîna malbat û parêzer ne luksek, ne lutfek e. Zagon hene. 5 sal in yek neçûye cem. Te negot derbekaran xwestin li Îmralî suîkastê çêbikin. Te negot, xwestin şerê navxweyî çêbikin, bi xesasiyetên kurdan bilîzin. Wê çaxê tu bi qasî me dizanî Ocalan çi ye, tu hay jê heyî. Wê çaxê tu çima nahêlî malbat û parêzerên wî herin. Ez ji vir de dibêjim bi mîlyonan kes Ocalanî rêberê xwe dibînin. Bi mîlyonan kes dê ji bo Ocalan li kuçeyan be, xwedî li rêberê xwe derkeve.

- Dema hûn li Îmraliyê derî bigirin bizanin ku hûn kilît li deriyê pêşeroja Tirkiyeyê didin. Vê yekê baş bibînin.

Heta îhaleyan her tişt Cemaet berpirs bû

- Li her bajarê teşkîlatên veşarî yên Cemaetê hene. Min got veşarî, biborin, eşkere. Heta îhaleyan jî wan li her tiştî dinêrî. Ji aliyek tu dibêjî 'Cemaetê ez xapandin bila Xwedê min efû bike' li aliyek din jî tu dibêjî 'Cemaetê tu xapandî ez te ji kar diavêjim'. Ma edaletek wisa dibe? Wê çaxê em bangî hemû kesên Cemaetê ew xapandine bikin ku bila îstîfa bikin.

- Ger derbe bi ser biketa dê kî biba serokwezîr? Çima eşkere nakin?

Doza KCK'ê

Di sala 2009'an de di 'Doza KCK'ê' de operasyon çêbûn 10 hezar siyasetmedarên me hatin girtin. Dema me Mebûsê Wanê yê AKP'ê Beşir Atalay hişyar kir digot 'Cemaet dizane çi dike'. Ev gotinên Beşir Atalay bûn. Bila were, em gotinên wî derxin holê.

Em leblebiyên ji hesin in

- Me tu demê zilm, çewsandin qebûl nekir. Binêrin her sê partî dê bên cem hev û dijî HDP'ê rabin. Ez dibêjin em ji bo we giran tên, me û yên parelelan tevlihev nekin. Em mafdar in. Her sê partî jixwe bi yek lingê ne. Li ser yek lingê dimeşin; yek ziman, yek milet, yek ampûl. Li vî welatî yek ziman tune ye. Yek ziman faşîzm e. Hîtler jî di propagandaya hilbijartinê de ev diruşm bikar anî bû. Niha di bin faşîzma Hîtler de hatin ba hev.

- Me ligel 'paralel' hewl neda dewletê bi dest bixin. Em wisa ne binkî ne. Em mafên xwe dixwazin, mafên xwe.

- Em leblebiyên ji hesin in, her ku hûn bixwazin bicûn dê diranên we bişkên. Em bang dikin werin em aştiyê çêbikin. Ne ji ber tirsê ye ev banga me, ji ber rawestina me ya bi rûmet em bang dikin.

- Ger êrîşê mebûsên kurdan dikin, zarokên wan li bodroman îngaz dikin bizanin derketina pêş tangan ji bo me karek meşrû ye.

Biçek ehlaqê te hebe Cizêrê fêm bike

- Li Sûrê, Cizîrê, Nisêbî kevir li ser kevir nehiştin. Me dizanî dê derbe çêbe. Yên li Geverê xanî bi xanî dişewitand di heman demê de gora te dikola. Dema me qal dikir mebûsên AKP'ê êrîşê me dikirin. Digotin 'Leşker bi ser sivîlan de gule nabarîne.'. Niha ger piçek ehlaq li cem we hebe hûnê Cizîrê fêm bikin. Tirk çawa li pêşberî tangê disekine û xwedî li mebûsê xwe yê ku hilbijartiye derdikeve dê kurd jî xwedî lê derê. Tu bi tang û topan gel tehdîd bikî dê kurd jî ber xwe bide.

- Ji ber Wanê xwedî li Gewerê derket em sipasiya xwe ji bo Wanê dikin. Em bawer dikin ev xwedîlêderketin dê bidome.