Diyarname
Li Culemêrgê pirek bi navê "Pira Çetin Dogan" heye. Ev pir di sala 2000'î de hatiye çêkirin. Wê demê Korgeneral Çetin Dogan Serleşkerê Kolordiya Asayîşê ya Jendirmeyên Wanê bû û navê Dogan li pirê kirin. Pir, paşê hatibû şewitandin lê di sala 2006'an de dîsa hatibû çêkirin. Di vê salê de Rêveberiya Taybet ya Îdareya Bajarê bi trîlyonek û 900 mîlyar TL'yî pir dîsa çêkiribû û dîsa tabelaya berê lê daliqandibû. Gelê herêmê li ser vî navî nerazî bû. Doganê ku serleşkerekî malnişîn e û Serfermandarê Kolordiya 1'emîn bû niha di doza Ergenekonê de tê darizandin.

Pira Çetin Dogan li Çelê ye. Hefteya borî di çalakiya Mertalên Zindî* de polîsan bi guleya bombeya gazê Endamê Meclisa Giştî ya Wanê Yildirim Ayhan kuşt. Li ser vê yekê di civîna Meclisa Giştî ya Bajarê Culemêrgê ya meha rezberê de, yek ji endamên meclisê Ferhan Yazgan bi ser navê endamên Meclisa Giştî ya Culemêrgê yên BDP'yî pêşniyarnameyeke da meclisê û xwest navê Çetin Dogan ji pir bikin û navê Yildirim Ayhan li pir bikin.

Serokê Meclisa Bajêr ya Culemêrgê Ferzende Yilmaz ev pêşniyarname ji bo dengdayîna endamên meclisê pêşkêş kir. Di dengdayînê de 14 endamên meclisê yên ji BDP'ê û yek yê AKP'ê, bi giştî 15 endamên meclisê pêşniyarname qebûl kir.

Her wiha di salona civînê de wêneyên Ayhan hatin daliqandin û ew hat bibîranîn. Di civînê de endamên meclisê li ser maseyan jî navê Ayhan nivîsandibûn.

Piştî qebûlkirina pêşniyarê, ji bo erêkirinê ev pêşniyarname dê ji walîtiya Culemêrgê re bê şandin. Ger walîtî vê guherînê qebûl bike dê navê pir bê guherandin. Ger qebûl neke mafê endamên meclisê heye ku careke din biryarê bi dengê endaman ji walîtî re bişîne û piştî vê yekê jî ger dîsa walîtî qebûl neke dikare doz bê vekirin.

***