Diyarname
Li Serêkaniyê ya Rihayê gere "Şahiya Biharê" li dar biketa, lê hat betalkirin. Hunermend Xecê li navçeyê bi vîdeoyê got, "Em lêborîna xwe ji gel dixwazin, ne ji me ye, em hatin vir ji bo konserê lê şaredarî ragihand ku şahî hatiye betalkirin."

Şaredariya Serêkaniyê bi rojan berê ragihandibû ku 10'ê mehê wê "Şahiya Biharê" li dar bixe. Ji bo vê yekê bername amade bû. Şaredarî bi ser hesabê xwe yên tora civakî re ev agahî belav kiribû, vîdeoyên hunermendan jî belav kiribû. Her wiha şaredarî cihê ku dê şahî li dar bikeve jî bi erebeyên xwe rast kiribû. Dîsa şaredarî bi ser hesabên xwe re fotoyên otobusên xwe jî belav kiriebû ku dê bê pere gel bibe cihê şahiyê. Mabû ku roja dawî, li wê derê şahî li dar bikeve.
Lê roja ku dê şahî li dar bikeve şaredarî li ser hesabê xwe ev peyam belav kir, "Di çarçoveya 'Şahiya Biharê' de bernameya konseran ku dê îro li dar biketa ji ber sedemên mecbûrî û em ne li bendê hat betalkirin. Em sipasiya aramiya gelê xwe dikin û bi hurmet vê agahiyê belav dikin."

Şaredarî ev agahî belav kiriye lê sedema belavkirinê eşkere nekiriye.

HUNERMEND XECÊ VÎDEO BELAV KIR
Heman rojê hunermend Xecê ku ligel koma xwe gihîştibû Serêkaniyê bi biryara betalkirina konserê hesiya. Xecê bi ser hesabê xwe yê X'ê re bi kurdî û tirkî vîdeoyek ji bo agahiyê belav kir û got, "Em lêborîna xwe ji gel dixwazin, ne ji me ye, em hatin vir ji bo konserê lê şaredarî ragihand ku şahî hatiye betalkirin."

SEDEM ÇI YE?
Di şahiyê de ligel hunermend Xecê, hunermend Hamit Karadeniz jî dê konser bida. Hinan li bin hesabê fermî yê Şaredariya Serêkaniyê nivîsiye ka sedema betalkirinê çi ye, wê eşkere bikin.