Diyarname
Li ser kesên hatin rizgarkirin, hejmara kesên jiyana xwe ji dest dane û agahiyên din notên rojekê:

Li Erdîşê 2 ciwan hatin rizgarkirin

Vê êvarê di bin avahiyeke hilweşandî 2 ciwanên lîseyê bi saxî hatin rizgarkirin, ciwanekî din jî cenazeya wî hate derxistin.

Li Erdîşê di avahiya ku hilweşiya de înternet cafe hebû. Avahiya li ser Kolana Zeylan piştî ku hilweşiya malbarên Omer Yilmaz, Faruk Yilmaz û Harun Kaya ragihandin ku zarokên wan li înternet cafeyê bûn. Li vê derê dest bi lêgerînê hate kirin. Di encamê de Faruk Yilmaz û Omer Yilmaz bi saxî hatin derxistin lê Harun Kaya jiyana xwe ji dest da. Her du ciwanên ku hê di şokê de ne rakirin nexweşxaneyê û hate gotin ku rewşa wan baş e..

Her wiha li Taxa Camîkebîrê jî Mesut Ozan Yilmaz û Abdullah Pinti jî bi saxî hatin rizgarkirin.

22 mamoste mirin

Wezîrê Perwerdehiyê ragihand ku li Erdîşê 19 mamoste bi giştî 22 mamoste di erdhejê de mirin

Hikumetê soz da lê soz neanî cih

Rayedarên hikumetê gotin vê êvarê (24.10.2011) ewê elektrîka Erdîşê berdin lê ev gotin nehat cih. Li Erdîşê îşev jî gel di tarîtiyê de derbas dike.

Li Wanê 500 hezar kes mexdûr e

Şaredariya Wanê got ku alîkariyên ku têne kirin têre nakin û niha 500 hezar wanî li derve, mexdûr in.
Serokê Meclisa Şaredariya Wanê Sabri Abi got: Pêdivî bi konan heye. Kizilay dibêje ku 8 hezar kon danîne lê 100 hezar heb jî têre nake. Temamê gel li derve ye. Sedî 60'ê Wanê xira bûye. Rewşa gundan xirab e. 30-40 gund bi temamî hilweşiya ne.

'Kizilay rola xwe neani cih'

Cîgirê Serokwezîrê Tirkiyeyê Huseyin Çelik li ser pirsa CNNTurkê ku kon têre nakin got: "Rast e. Kizilay di vî warî de rola xwe neaniye cih."

Ozgokçe: Gel tenê xwe digihîne şaredarî

Seroka Komeleya Jinan a Wanê Zozan Ozgoçke beşdarî televîzyona CNNTurkê bû û got: "Li vê derê gel bi nimreya 110 dikare xwe bigihîne şaredarî. Ji şaredarî alîkarî dixwaze. Şaredarî alîkariyê dike, lê îmkanên wê têre nakin. Lê gel nikare xwe bigihîne nimreyên 112 û 155. Ew bersivê nadin."

279 mirî

Li gor agahiyên êvarkî hejmara miriyan gişît 279 kesî û hezar û 300 kes jî birîndar hene.