Stenbol
Ji bo bîranîna rojnameger Musa Anter û şehidên çapemeniya azad rojnameya Azadiya Welat û rojnameya Alternatif "15'emîn Pêşbaziya Mûsa Anter û Şehîdên Çapemeniya Azad " li dar dixin. Serlêdanên ji bo pêşbaziyê wê heta 5'ê rezberê bên qebûlkirin. Xelat jî wê di 20'ê rezberê de li warê Musa Anter li Nisêbînê bêne dayîn.

15'emîn Pêşbaziya Mûsa Anter û Şehîdên Çapemeniya Azad, wê îsal ji aliyê rojnameya Azadiya Welat ve bê lidarxistin. Pêşbazî dê di warê nûçeyên tirkî, kurdî, karîkatur û wêneyan bê lidarxistin. Kesên ku biwazin beşdarî pêşbaziyê bibin divê heta 5'ê rezberê berhemên xwe bişînin ber destê komîteya amadekar. Kesên bi ser bikevin jî dê roja 20'ê rezberê bi merasimeke xelatên xwe bigirin.
Di beşa nûçeyên kurdî de Kakşar Oremar, Reşad Sorgul, Semîha Alankuş, Adîl Zozanî û Ertuş Bozkurt; beşa nûçeyên tirkî de jî Aydin Çubukçu, Murat Çelîkkan, Fatîh Polat, Ahmet Tulgar, Huseyîn Aykol wekî endamên juriyê diyar kirine.
Di beşa wêneyan de Ramazan Ozturk, Gultekîn Tetîk, Îsa Çelîk, Çerkes Karadag, Zafer Tuzun û di beşa karîkaturan de jî Tan Oral, Gulay Batur, Ender Ozkahraman, Rewhat û Halîl Încesu di juriyê de cih digirin.

Şertên tevlîbûna pêşbaziyê:

- Zimanê pêşbaziyê bi tirkî û kurdî ye. Nûçe divê bi kurdî yan bi tirkî be. Her wiha karîkatur û wêne beşên din ên pêşbaziyê ne.

- Ji bilî beşên hatine diyarkirin, wê Xelata Taybet a Jurî ya Gurbetellî Ersoz bê dayîn.

- Ji bo her beşekê wê xelatek bê dayîn.

- Dema di beşên nûçe û wêne de nirxandin bêne kirin, ji bilî berhemên ku ji pêşbaziyê re rasterast hatine şandin, wê pêşniyarên lijneyên pêşdagirtinê yên ji bo lijneyên hilbijêr jî li berçav bêne girtin.

- Xelata ji bo beşên nûçe, wêne û karîkaturan 2 hezar YTL ye.

- Endamên lijneya hilbijêr, xebatkarên rojnameyên Azadiya Welat û Alternatîfê  nikaribin tevlî pêşbaziyê bibin.

- Berhemên tevlî pêşbaziyê bibin, divê nehatibin weşandin an jî piştî 20'ê rezbera 2007'an nehatibin weşandin.

- Divê berhem herî dereng heta 5'ê rezberê bên teslîmkirin.

- Her kesek dikare beşdarî beşek pêşbaziyê bibe.

- Divê berhemên di beşa nûçeyan de tevlî pêşbaziyê bibin wekî 7 sûretan bên şandin.

- Li goşeyên jêrîn ê aliyê çepê yê rûyê paşîn ê berhemên ku di beşên karîkatur û wêneyan de beşdar dibin, bi etîketek ku tê de navê berhemê (ji bo wêne cih û dem) heye bê danîn. Divê ebatên berheman herî kêm 18x24, rengîn an jî reş û spî be.

- Kesên xelatan heq bikin, wê di 15'ê rezberê bêne ragihandin.

- Xelat wê di 20'ê rezberê de bi merasîmê teslîmî xwediyên wan bêne kirin.

-  Berhemên ji bo pêşbaziyê bêne şandin, dê li xwediyên wan re neyên vegerandin û di rojnameyê de bên weşandin.

- Kesên beşdarî pêşbaziyê bibin divê kurtejiyana xwe tevî wêneyekê xwe jî bi berhemê re bişînin.

- Kesên bixwazin beşdarî pêşbaziyê bibin divê berhemên xwe "nûçeyên bi tirkî", "Karîkatur " û "wêneyan" bişînin navnîşana, Apartmana Umutcan a Kolana Mîs ya Cadeya Îstîklal a Taxa Şehît Muhtar a Beyogluya Stenbolê No: 19 Daire: 4 Beyoğlu-İstanbul.
Berhemên ji bo "nûçeya kurdî" jî, wê ji navnîşana Huzurevleri 20. Sokak Ekin Apartmanı Zemin Kat No: 2 Diyarbakır re bêne şandin.

Yekemîn Pêşbaziya Mûsa Anter û Şehîdên Çapemeniya Azad di sala 1993’yan de ji aliyê “Ozgur Gundem”, 94’an de “Ozgur Ulke”, 95’an de “Yenî Polîtîka”, 96’an de “Demokrasî”, 97 û 98’an de “Ulkede Gundem”, 99’an de “Ozgur Bakiş”, 2000’î de “2000’de Yenî Gundem”, 2001 û 2002’yan de “Yedîncî Gundem”, 2003’yan de “Yenîden Ozgur Gundem”, 2004, 2005 û 2006'an de jî ji aliyê “Ulkede Ozgur Gundem”, 2007'an de jî ji aliyê Gundemê ve hate dayîn.
Îsal jî rojnameya Alternatîf û Azadiya Welat bi hev re pêşbaziyê li dar dixin û xelatê bidin.