ENQERE
Partiya Civaka Demokratik (DTP) bi boneya destûra beşdarbûna hilbijartinên Herema Kurdistana Federal ên 25’ê Tirmehê ya 'Listeya Hiwayê' nedane ji Serokomarê Iraqê Celal Talabanî, Serokê Herêma Kurdistanê Mesut Barzanî û Serokê Parlementoya Kurdistanê Ednan Miftî re name şand.
Di nameyê de DTP'ê banga demokratîkbûnê li rayedarên kurd kir û xwest ku ev biryar dê tu fêdeyê nede pêvajoya demokratîkbûna Iraq û Federasyona Kurdistanê. Ligel hemû zordarî û qedexeyan jî partiyên kurdan dikarin li Tirkiyeyê bikevin hilbijartinê.

DTP’ê têkildarî astengkirina ketina hilbijartinên Herêma Kurdistana Federal ên 25’ê tirmehê ya Lîsteya Hîwayê name ji Serokomarê Iraqê Celal Talabani, Serokê Herêma Kurdistanê Mesut Barzanî û Serokê Parlementoya Kurdistanê Ednan Miftî re name şandin. Nameya ku bi îmzaya Hevserokên DTP’ê Ahmet Turk û Emîne Ayna hatiye amedekirin dan balyozgerên KDP û YNK’ê. Di nameya DTP’ê de wiha hate gotin: "Berî her tiştî em li ser navê Partiya Civaka Demokratîk (DTP) û li ser navê gelê xwe yê li Tirkiyêyê, silav û rêzên xwe pêşkêş dikin. Em ji dil hêvî dikin ku hilbijartinên 25'ê Tîrmehê yên Kurdistana Federal ji bo gelê herêmê xêr û xweşiyê bîne. Em dizanin dê bandora vê hilbijartinê ne tenê li ser Herêma Kurdistana Federal be. Em vê hilbijartinê ji bo gelê kurd ên li hemî dinyayê girîng dibînin."

'Lazim e em hiqûqa birayetiyê bikar bînin'

Di nameyê de rêbazên çareseriya pirsgirêka kurd û girîngiya demokratîkbûnê ya ji bo gelê kurd hate destnîşan kirin û ev tişt hatin gotin: "Em dixwazin bi bîr bînin ku hemû kurd û cihanê li benda çareserkirina pirsgirêka kurd a bi rêya demokrasiyê ne. Ji ber vê yekê divê em hiqûqa birayetiyê bikar bînin û ramanên xwe yên di warê girîngiya şefafbûn û zelaliya hilbijartinê û temsîliyeta adilane bînin ziman. Bi gorî me divê hemû saziyên peywirdar di nava hewldana ji bo hilbijartineke adîlane de bixebitin. Di vê çarçoveyê de em li benda “ji hemû partiyên siyasî re derfeta hilbijatinek bêalî û wekhev” bê amadekirin in. Ev mijar ji bo me pir girîng e. Em bi dil û can hêvî dikin ku hemû kes û sazî ji bo pêkanîna aştiyê ya herêmê bi hasasiyeteke mezin tev bigerin. Partiya me bi nûçeya di nava raya giştî de ku belav bûye û tê gotin ku “beşdariya Lîsteya Hîwa ya hilbijartinê qedexe bûye” re pir xemgîn e. Ji ber vê sedemê li ser navê demokrasiyê di endîşeyê de ye. Em dixwazin rasterast diyar bikin ev biryara ya ku saziya bilind a hilbijartinê ya Iraqê di rêya pêvajoya demokratîkbûnê de nabe alîkar."

'Ligel hemû qedewe û zordariyan partiyên kurd li Tirkiyeyê dikevin hilbijartinê'

Di nameyê de hate bi bîr xistin zimanê kurdî li Tirkiyeyê qedexe ye û zordariyên mezin li ser kurdan tên meşandin. Nameyê wiha domand: "Wekî hûn pêdizanin ku nasname ya kurdan nehatiye nasîn û zimanê kurdî hatiye qedexe kirin. Di wan şert û mercan de digel hemû zext, pêkutî û astegiyan siyasi ên li ser gelê kurd, li Tirkiyeyê partiyên li ser navê kurdan hatine avakirin dikarin bikevin hilbijartinan. Bi salan e ku we têkoşîna li hemberê nedemokratbûn û kirinên despotîk domandî ye. Lê em di wê baweriyêde nin, îro 'Lîsteya Hîwayê' ku bi şêweya îronîk li Herêma Kurdistana Federal têkoşîna bidestxistina mafên gelê kurd û demokrasiyê ji xwe re kiriye armanc, hîştina wan ya dervayê siyasetê ji pêvajoya demokratîkbûna Irak û Federasyona Kurdistanê re nabe alîkar. Em di wê hêviyê de ne ku hukumet û hemû saziyên we yên peywirdar di ezmûna hilbijartinê bi şêweya layiqî gelê kurd di riya demokratîkbûnê de pêk bîne. Bi vê yekê demokratîkbûna Rojhilata navîn re bibe mînak. Ji ber vê sedemê em, hilbijartinê ji hemû Kurdan re daxwaziya bixêrbûnê dikin û hêvîdarin ku hemû birayên me yên Kurd îradeya xwe bêastengî di sandoqên hilbijartinan de diyar bike."

Nameya DTP'ê bi gotina, "Bi van hestên biratiyê, ji we re serkeftinê dixwezin. Em ji we re silaven germ û rêzên xwe pêşkêş dikin" bi dawî bû.