Diyarname

"Ez li walî geriyam min got vê stranê qedexe bikin"... Ev gotina Wezîrê Karên Hundir ê Tirkiyeyê Suleyman Soylu ye. Soylu beşdarî civîna ku Weqfa Karadenîzê bû û diyar kir ku wî strana ji bo referandûmê ya HDP'ê qedexe kiriye.

Soylu wisa got: "Rojên borî HDP'ê stranek çêkiriye dibêje 'Ji yek dewletê re, ji yek miletê re, ji yek alê re bêjin na'... Ez di cih de li walî geriyam, min got 'Vê stranê qedexe bikin.' Nûnerên HDP'ê li min geriyan, min ji wan re jî got 'Ez nahêlim li tu derê Tirkiyeyê ev stran bê vegotin birê min. Ev qas hêsan e. Hûn hema valahiyek bidin li her derê welat belav dibin."

Di strana ku Soylu qal dike de gotinên "Ji yek alê, ji yek netewê, ji yek zimanî re bêjin" heye, lê di stranê de nabêje "Ji yek dewletê re"... Ev aliyek meseleyê ye, aliyê din bêyî biryara dadgehê yan a YSK'ê (Lijneya Bilind a Hilbijartinê) hebe bi yek gotina wezîr stran li her derê Tirkiyeyê hat qedexekirin.