Diyarname

29’emîn Festîvala Fîlman a Navneteweyî ya Stenbolê bi merasimekê dest pê kir. Di şeva vekirinê de li ser girtina Salona Emekê jî axaftin hatin kirin û xwestin Emek careke din bikeve faliyetê. Di festîvalê de li dor 200 fîlmî hene.

29’emîn Festîvala Fîlman a Navneteweyî ya Stenbolê bi merasima vekirinê ya li Salona Kongre û Pêşangehê ya Lutfî Kirdar vebû. Di şeva ku pêşkêşvaniya wê lîstikvan Yetkin Dikinciler û Ceyda Duvencî kir de Wezîrê Çand û Tûrîzmê Ertugrul Gunay jî têde lîstikvan, derhêner, rexnegir û hezkiriyên sînemayê, li dor 2 dezar kesî amade bû. Di şevê de Serokê ÎKSV’ê da zanîn ku di sala 1982’yan de wekî “Hefteya Fîlman” festîvalê dest pê kiriye û sala 1989’an da navê Festîvalê girtiye heta niha gelek gav avêtiye. Eczacibaşî wisa got: “Festîvala me îro digel bi bernameya xwe ya xweser nîşandayîna fîlmên bi qelîte û cureya wan, bi nêzîktêdayîna nûbûneke ku rê dide endustriya fîlmên navneteweyî ketiye asteke pêşeng a welatê me û ketiya nav festîvalên mezin ên Ewropayê.”

Emek divê dîsa vebe

Di dema axaftinê de du kesan li dû dikê da û girtina salona dîrokî Emekê şermezar kir. Eczacibaşi li ser Emekê jî axivî û wisa got: “Salona Emek ku bi festîvalê re bûye yek îsal di nav cihên ku lê fîlm têne nîşandayîn de nîn e û ev yek me xemgîn dike. Sînemaya Emekê ku di dilê sînemahezan de cihê wê yê taybet heye û ew sembola hebûna çanda me ye em hêvî dikin û li bendê ne ku di demeke nêz de cara din vebe û cihê xwe di nav çand û hunera bajarê me de cih bigire.”

Piştî axaftinan plaket dan sponsorên festîvalê û dûre jî Fatih Erkoç û Kerem Gorsev stranên “Moon River”, “Somewhere Over The Rainbow”, “Smile” û “Fly Me To The Moon” pêşkêş kirin.

Kadir İnanir xelatên rûmetê girt

Di şevaê de Xelatên Rûmetê yên Sînemayê jî hatin dayîn. Vesazkar Mevlut Koçak xelata xwe ji destê lîstikvan Nurgul Yeşilçay girt. Di warê derhênerî de jî xelata rûmetê dan derhêner Feyzî Tuna. Tuna xelata xwe ji destê lîstikvan Fatoş Guney girt. Tuna, di kurteaxaftina xwe de got “Îşev ez di nav du hestan de me. Yek jî heyecana ku ez niha dijî me. Ya diduyan jî ev 48 sal in ez di vî karî de m emin qet xelat negirtiye. Ev yekem xelata min e. Ezê xwedî lê derêm. Ger ronahîsaz, senaryonûs, kedkarên sedê, vesazkar, kesên navên wan di jenerîkên ku zû diherikin de nîn bana ezê îşev ne li vir bama” û bi vî awayî sipasiyên xwe pêşkêşî wan kedkaran kir.

Herî dawî jî lîstikvanê navdar ê Tirkiyeyê Kadir İnanir ji bo girtina xelata rûmetê derket ser dikê. İnanir xelata xwe ji destê lîstikvan Zuhal Olcay girt û wisa got: “Ez vê xelatê li ser navê mirovên reben, bi rûmet û xweşik ên vî welatî digirim.”

Di dawiya şeva vekirina festîvalê de xelata “Serketina di Hemû Jiyanê de” dan derhênerê îtalî, senarîst û lîstikvan Marco Bellocchio. Fîlmê Bellocchio yê bi navê “Yenmek/Têkbirin” ku li ser Ida Dalcer a diya zaroyê Mussoliniye ku Mussolini tu demê qebûl nekiribû ku ew kurê wî ye, wê bê nîşandayîn. “Yenmek” 3’yê mehê saet 16’an de li Sînemaya Atlasê wê bê nîşandayîn.

'The Concert' eleqeyek mezin dît

Şev bi nîşandayîna fîlmê “Li Parîsê Konsera Dawî / The Concert” ê derhêner Radu Mihailenau ku li Fransayê rekora gîşeyê şikandiye hat nîşandayîn. Lîstikvanê fîlm Aleksei Guskov jî di nav mêvanên şevê de bû. “The Concert” bi eleqeyeke baş re rû bi rû ma.

Fîlmên festîvalê îsal li Beyogluyê li salonên sînemayê Atlas, Yeni Ruya, Beyoglu, Sinepop, Muzeya Pera, li Kadikoyê sînemaya Kadikoyê û li sînemaya Nîşandayî CityLife têne nîşandayîn.

Di festîvala ku heta 18’ê mehê wê li dar be de gotûbêj, konser û şahî jî hene.

***

Nûçeyên li ser 29'emîn Festîvala Fîlman a Navneteweyî ya Stenbole ên ku berê di Diyarnameyê de hatine weşandin:

- Bilêtên fîlmên festîvalê li benda we ne

- Li Stenbolê 200 fîlm li benda we ne