Xecîcan Farqîn*

Bi hevkariya Komela Wêjekarên Kurd û Komela Lêlolînên Ziman (Medder) li Amedê Kargeha Nivîskarîya Afirîner dest pê kir.

Ji bo kargehê nivîskar Dîlawer Zeraq, Omer Dilsoz, Yildiz Çakar, Sîdar Jîr, Lal Laleş û Şêxo Filîk wê li ser teoriya ziman û niviskariyê şeş hefteyê dersan bidin.

Dersa yekê ya nivîskar û lêkolîner Dîlawer Zeraq bû ku mijara wê jî ramana ziman bû.

Têgeha nivîskarîya afirîner çi ye, mamosteyê kargehê Zeraq bersîva wê da û dîyar kir ku afirînera ku tê qal kirin hem afirandina zimanê taybet e hem jî afirandina vegotineke taybet e.

"AFIRÎNERIYA NIVÎVKÎ YA WÊJEYÊ CAREK TÊ AFIRANDIN"

Zeraq got: "Ev ne vegotina çîroka devkî ya di nav gel de ye. Folklor ango çîrokên gelerî jî afirandin in, lê ew bi devkî hatine afirandin. Tevî ku heman çîrok e, li gelek deveran guheriye. Lê, afirîneriya nivîskî ya wêjeyê carek tê afirandin û hew bi wî rengê tê afirandin. Ji ber ku careke din tu kes nikare bi wî rengî bi heman awayî biafirîne. Taybetiya wê afirîneriyê di wê yekcarekbûnê de dihewe. Ew yekcarekbûn wê dike wehewaneke, kiraseke taybet."

ARMANCA BERÇAVÎVKIRINA WÊJEYA KURDÎ

Hevserokê Komela Wêjekarên Kurd, Rêdûr Dîjle jî dibêje ku dema wan dest bi xebatê kiriye li ser pirsa ‘Ewê çawa wêjeya kurdî berbiçav bikin" sekinîne û li ser pêdiviyê nêrîna lidarxistina vê kargehê çêbûye.

Dîjle da zanîn ku ev kargeh ji hînkirina nivîskariyê wêdetir, kartêkariya wêjeyê dide pêş û konteksteke berfireh a netewî dike armanc.

Dîjle wisa didomîne, "Helbet xwe ji nirxên estetîkî yên şêweyê vegotinê yên li seranserê cîhanê berbelav in nade alî, lê piranî li ser hîma çandê û zimanî tevdigere. Her afiraneke wêjeyî di heman demê de bîr û hafizaya neteweyî ye, bi kurtahî ev kargeh bîra çandî ya kurdî jixwe re esas digre."

Kargeh wê şeş hefteyan bidome û 20 kes ji wê re hatine bijartin û zanîn, xwendin û nivîsîna kurdî ya asta bilind wekî şertê serekî hatiye danîn.

'ÇIMA EZ NIKARIM BI ZIMANÊ XWE WÊJEYÊ HÎN BIBIM'

Belkis yek ji beşdara kargehê ye ku wê li zanîneghê wêjeya tirkî xwendîye.

Belkis got ku pirsa "çima ez nikarim bi zimanê xwe wêjeyê hîn bibim" berê wê daye wêjeya kurdî.

Hêjayî gotinê ye ku Kargeha Nivîskarîya Afirîner piştî Amedê, li Êlih (Batman), Mêrdîn û li Wanê jî pêk were.

*Ji VOA Kurdî hatiye girtin. Di nûçeyê de sernav û tiştên biçûk me guhartin.