Diyarname
Piştî teknîk dîrektorê Duhoksporê Mesut Meral dest ji kar berda, tîm teslîmê teknîk dîrektor Emîr Azrefşan kirin. Meral bakurî bû, Azrefşan rojhilatî ye, her du teknîk dîrektor jî ji Swêdê hatine. Her du jî 37 salî ne. Rêya her du yan jî ji Dalkurdê re derbas bûye.

MESUT MERAL Ê BAKURÎ ÇÛ
Tîma fûtbolê Duhokspor di Lîga Super a Iraqê de dilîze û di dawiya hefteya 34'an de bi 51 pûanî di rêza 7'an de ye. Teknîk dîrektor Mesut Meral ku ji Nisêbînê ye, lê li Swêdê mezin bûye par di meha gelawêjê de li Duhoksporê dest bi karê teknîk dîrektorî kir. Meral li Swêdê dest bi teknîk dîrektorî kir, li Dalkurdê cîgirê teknîk dîrektor bû, di sala 2023'yan de li Al-Wasla Erebistana Siûdî dest bi teknîk dîrektorî kir, piştî salek hat Duhokê.
Teknîk dîrektor Meral di vê saleke Duhokê de Duhok di Lîga Şampiyonan a Korfezê de kir şampiyon û kûpa girt.
Lê di van hefteyên dawî de di lîgê de rewş ne baş bû. Meral ligel hakem ketibû nava nîqaşê, ji ber vê jî 5 hefte ji peywirê hatibû menkirin.
Meral îstîfa kir û bi ser hesabê xwe yê tora civakî re peyamek belav kir. Meral got ku ji her alî ve ev sala li Duhokê ji bo wî baş derbas Bûye û gotiye, "Di Lîga Şampiyonan a Kendavê de em bi ser ketin ezê qet vê yekê ji bîr nekim, helbet ezê bêriya vê pêvajoyê bikim lê Duhok Spor dê rêwîtiya xwe bidomîne.
Meralê sipasiya hemû rêveberî, lîstikvan û temaşevanên Duhoksporê kiriye.

Mesut Meral ligel Duhoksporê bû Şampiyonê Lîga Şampiyonan a Kendavê.

*
EMÎR AZREFŞAN Ê ROJHILATÎ HAT
Teknîk dîrektor Emîr Azrefşan ji Umriyeyê ye, hemwelatiyê Swêdê ye.
Piştî lîstikvanî di sala 2016'an de wekî cîgirê antrenor dest bi vî karî kiriye. Paşê tîmên Ostersund, Dalkurd wekî teknîk dîrektor bi rê ve biriye û roja 24'ê gulana 2025'an ligel tîma Duhokê peyvan girê daye.
Emîr Azrefşan xwedî Pro Lîsansa UEFA'yê ye û wekî teknîk pergala 4-2-3-1 bikar tîne.