Diyarname
Serokê Meclisa Tirkiyeyê Numan Kurtulmuş, ligel endamên Komîsyona Hevgirtina Neteweyî, Biratî û Demokrasiyê" çû serdana Hevşaredarên Bajarên Mezin a Amedê Serra Bucak û Dogan Hatun. Di hevdîtinê de Waliyê Amedê Murat Zorluoglu, Hevserokên Meclisa Şaredariya Bajarê Mezin a Amedê Demet Ceylan û Ayhan Karatekin jî amade bûn.

Di civîna ku Hevşaredar Hatun bi kurdî pêşwazî li mêvanan kir de li ser rewşa heyî ya Pêvajoya Aştî û Civaka Demokratîk, çareserkirina pirsgirêka kurd û pêşketinên li Rojhilata Navîn axivîn.

Hevşaredarên Bajarê Mezin nexşek ji hevrîşimê ku fîgurên şêr (hêz) û rojê (enerjî) ji Keleha Zembilfroş a Farqînê nîşan dide, pêşkêşî Kurtulmuş kirin. Kurtulmuş jî pirtûka "Mem û Zîn" a Ehmedê Xanî ya ku Wezareta Çandê ya Tirkiyeyê çap kiribû da şaredaran.

'ZIMANÊ DAYIKÊ HELAL E'
Kurtulmuş berî vê hevdîtinê li Zanîngeha Dîcleyê beşdarî merasima serdema nû ya Zanîngehê bû. Kurtulmuş li vir axivî û li ser ziman got, "Zimanê dayikê bi qasî şîrê dayikê helal e. Li vî welatî ji bo kesek zimanê dayikê bikar tîne kes nikare wî/ê bigire bin lêpirsînê. Ji ber ziman li welat cudakarin nabe. Ji ber ku em dizanin ziman ji bo însan cihê herî nêz ê dil e. Em dizanin ku li Tirkiyeyê 'ziman' bi wateya 'dil' tê bikaranîn. Ziman ne tenê ew tiştên em pê diaxivin in. Loma em dibêjin bi ser ziman re cudakarî kirin li cem me nayê qebûlkirin."
Kurtulmuş berê (30.09.2025, Li Macaristanê, li ser pirsa rojnamegeran) gotibû, "Ji bilî tirkî, tu zimanekî wekî zimanê duyem ê fermî nayê qebûlkirin, nayê axivîn."