Diyarname
Weşanên Avestayê wê "Ferhenga Têgihên Derûnnasiyê" derxe. Edîtoriya kovara Psychology Kurdî ev yek amade kiriye. Yek ji xebatkarên berê yê vê kovarê Kenan Ormek gotibû keda wî xwarine, û gotibû ku çima navên kesên din li ser ferhengê heye, lê yê wî tune ye. Li ser vê piştî gelek nîqaşan her du aliyan li hev kir.

Li ser vê li hev kirinê Weşanên Avestayê bi ser hesabê xwe yê X'ê re agahî belav kir. Di dema nîqaşê de wekî Diyarname me nûçe çêkiribû, di dema ku niha mesele hel bûye de em vê agahiyê jî belav dikin.

Avestayê di peyama belav kiriye ke gotiye ku "Me wekî Weşanxaneya Avestayê pêwîst dît ku bi hûrgilî li ser vê meseleyê rawestin" û diyar kiriye ku ligel edîtorên kovarê yên niha û ligel Kenan Ormek civîn çêkiriye û mesele hel bûye.

Avestayê wisa gotiye, "Ji bo ku ev mesele zelal bibe, me di 12ê Gulana 2026an de bi edîtorên kovarê yên niha û Kenan Örmek re civînek kir û em bi her du aliyan re axivîn.
Kenan Örmek di sala 2023an de, bi daxwaza xwe, piştî hejmara 16an ji kovarê veqetiyaye. Piştî veqetînê, têkiliya wî bi edîtoryayê re qut bûye û di pêvajoya paşîn de di navbera her du aliyan de ti diyalog çênebûye.
Xebatên amadekariya “Ferhenga Têgihên Derûnnasiyê” di sala 2025an de bi awayekî aktîf ligel edîtoryaya nû hatine birêvebirin. Di vê demê de zêdetirî 12 civînan hatine lidarxistin, termên derûnnasiyê hatine revîzekirin, hin têgih hatine derxistin û gelek  lê hatine zêdekirin. Herwiha nêrînên pisporên ziman û derûnnasiyê hatine wergirtin û piştî van nêrînan berdewam kiriye. Ji ber ku hatibû texmînkirin ku Kenan Örmek wê beşdarî van xebatên amadekariyê yên ferhengê nebe, di wê qonaxê de têkiliyeke rasterast pê re nehatiye danîn. Edîtoryaya kovarê di vê mijarê de kêmasiya xwe qebûl dike. Bi heman awayî, Kenan Örmek jî diyar dike ku ji aliyê edîtoryayê ve bendî gavekê bû lewma wî bixwe jî têkilî daneniye û ew jî di vê mijarê de kêmasiya xwe qebûl dike.
Ji ber ku xebata çapa yekem a “Ferhenga Têgihên Derûnnasiyê” ya ku ji 2.755  têgihan vedihewîne qediyaye û çap bûye, her du aliyan li ser çareseriyeke wisa li hev kiriye: Bo amadekariya çapa duyemîn a berfirehkirî her du alî dê bi hev re bixebitin û di xebatê de cih bigirin.
Em wekî weşanxaneya Avestayê ji bo helwesta diyalogê û nêzîkbûna her du aliyan ya ji bo çareseriyê spasdar in. Em her tim amade ne ku piştgiriya xebatên wisa zanistî bikin."

***

Nûçe û nivîsên eleqedar:

- 'Ferhenga Derûnnasiyê' a kî ye, kî diziye, Avesta wê çi bike?

- Bersiva Tometbariya (Meseleya Ferhenga Derûnnasiyê)