AMED
Şaredariya Peyasê ya Amedê di nav “Pirtûkxaneya Berhemên Jinan” de bi navê pirtûkdanka Aştiyê ya Dayika Taybet Înan vekir. Dayika Taybet di sala 2015’an de, di dema qedexeya derketina derve de li navçeya Silopiyê ya Şirnexê li ber mala xwe hatibû qetilkirin û termê wê bi rojan li kolanê hatibû hiştin.
Bi hevkariya Gerînendetiya Polîtîkayên Jinan a Şaredariya Peyasê û Komeleya Xebatên Civakî yên ji bo Aştiyê (BATOÇA), di nav Pirtûkxaneya Berhemên Jinan a li Parka 75’an de beşek bi navê Pirtûkdanka Aştiyê ya Dayika Taybet Înan hat damezrandin.
Di merasîma vekirinê de Hevşaredarên Peyasê Bêrîvan Gulşen Sîncar û Cengîz Dûndar, ligel malbata Dayika Taybet Înan, Dayikên Aştiyê û endamên komeleya BATOÇA amade bûn.
Piştî nîşandana vîdyoyeke kurt a ku jiyana Dayika Taybet Înan vedibêje, Hevşaredar Sîncar û Dûndar axivîn û diyar kirin ku zindîhiştina navê Dayika Taybet Înan bîrdariyeke girîng e ji bo ku muameleya nemirovan e ya ew pê re rû bi rû maye neyê jibîrkirin.
Piştî axaftinan, keça Dayika Taybet Înan, Şaristan Algan jî axivî û da zanîn ku Dayika Taybet ne tenê dayika wan e, dayika hemû kurdan e. Di dawiya bernameyê de, malbatê teqezî li ser girîngiya nejibîrkirina van bûyeran kir û spasiya hemû kesên ku beşdarî vê projeyê bûbûn kir.