Diyarname
Di "Doza KCK'ê ya Sereke" de yekemîn car dadgehê destûr da ku bi kurdî parastin bê kirin. Şaredarê Batmanê Nejdet Atalay bi kurdî parastina xwe kir. Di Doza KCK'ê ya li Wanê de jî Şaredarê Edremîtê Abdulkerim Sayan û Şaredarê Qelqelî Murat Durmaz hatin berdan.

Şaredar Atalay parastina xwe bi kurdî kir

Di "Doza KCK'ê" de heta niha siyasetmedarên kurd her dixwestin bi kurdî parastina xwe bikin lê dadgehê her carê mîkrofon digirit û nedihişt ew bi kurdî parastina xwe bikin. Ji ber vê yekê jî siyasetmedarên kurd ev nêzî sê salan e bêyî ku parastina xwe bikin girtîne.
Duh li Meclisa Tirkiyeyê zagona parastina bi kurdî hate qebûlkirin. Û îro di "Doza KCK'ê ya Sereke" ku li Amedê li 6'emîn Dadgeha Cezayê Giran li dar ket de Şaredarê Batmanê Nejdet Atalay bi kurdî parastina xwe kir. Dadger vê carê mîkrofon negirt. Dadger xwest Atalay bi kurtahî bi kurdî parastina xwe bike, parêzerê wî Mehmet Emin Aktar ket navberê
got ku ev 3 sal in muwekîlê wî yekem car parastinê dike û divê sînor nedin pêşî.

Li Wanê du şaredar hatin berdan

Di "Doza KCK'ê" ya li Wanê de ku Şaredarê Wanê Bekir Kaya jî di nav de 13 siyasetmedar têne darizandin, danişîn li dar ket. Di dozê de Şaredarê Edremitê Abdulkerim Sayan û Şaredarê Qelqelî Muraz Durmaz hatin berdan û doz heta 22'yê meha pêşiya me hat taloqkirin.