NAVENDA NÛÇEYAN

Zordariyên li ser çapemenî û ragihandina kurdî didomin. Niha jî dengê DÎJLE TV hat birîn. Koordînatorê Giştî yê Weşanê yê Dîcle TV Hasan Sancar bal kişand ser cotstandartiya li wan hatiye kirin û got, "Li Tirkiyê peymana salane heye, lê em neçar hiştin ku du mehan carekê, yanê salê şeş caran peymanê nû bikin."

Sancar li ser astengiyên li pêşiya ragihandin û xwe îfadekirina kurdan wisa û got: "Di dîrokê de daxwazên kurdan ên herî însanî her tim hatin redkirin. Hewl hat dayîn ku deriyê xwe îfadekirina kurdan bê girtin. Tevî hemû zext û zordariyan jî kurd tu carî bêzar nebûne û her tim li rêyên çareseriyê geriyane."

Koordînetorê DÎJLE TV'yê Sancar bibîr xist ku li Tirkiyê 400 kanalên televîzyonê hene, got ku tenê xwe li weşanên kurdan ranagirin û got, "Ji ber ku DÎJLE TV deng û rengên kurdan ji cîhanê re radigihand, hat girtin. Li Tirkiyeyê, televîyona ku bi awayekî objektîf nûçe bi kurdî dida DÎJLE TV bû. Ji ber vê yekê jî li herêmê, Rojhilata Navîn û Ewropayê gelekî dihat temaşekirin. Li Tirkiyê, tevî ku kanalên weşanê salane peymanan mor dikin jî, DÎJLE TV neçar hat hiştin ku salê 6 caran peymanê nû bike. Yanî, her du mehan, sê mehan carekê dixwestin weşana me asteng bikin. Me jî gotin ku ev yek cotstandardiye û me xwest em jî karibin peymana salane mor bikin. Tevî ku pêşniyara me hat qebûlkirin jî, 268.000 TL ceza li me birîn, weşana me sekinandin û peymana me fesih kirin. Li gel tu biryareke dadgehê li holê tuneye jî, weşana me bi awayekî kêfî qut kirin. Dîsa, ligel ku hê 15 roj ji bo peymana me mabû jî, bi şiklekî bê edaletî, weşana me birîn."