Rojnamegerên Sînornenas (RSF) ji bo rojnamegera kurd Denîz Firat a di êrîşên çeteyên DAIŞ'ê de jiyana xwe ji dest da daxuyaniyek weşand û got: "Em ji malbatê û hemû xizmên wê re sersaxiyê dixwazin. Divê ji bo mercên ji dest dayîna jiyanê ya Firat bê lêkolînkirin, lêpirsîn bê destpêkirin."

Rêxistinê ragihand ku rojnameger Denîz Firat roja 8'ê gelawêjê saet di 17:00 de, dema şerê li Mexmûrê yê 40 kîlometre dûrî Hewlêrê lêkolîn dikir, ji ber parçeyên topa obusê li dilê wê ket birîndar bû û wefat kir.

Di daxuyaniyê de hat diyarkirin ku cenazeyê Denîz li Wanê cihê lê ji dayik bûye hatiye veşartin û wiha hat gotin: "Rojnamegerên Sînornenas ji malbat û xizmên wê re sersaxiyê dixwazin. Der barê mercên mirinê yên Leyla Yildizhan de divê lêpirîn bê destpêkirin."

Di daxuyaniyê de hat destnîşankirin ku divê ev bûyera bi êş nîşanî aliyan bide ku di rewşa şer de rojnamegerî çiqasî girîng e û wiha gotin:"Pêwîst e ji bo ewlekariya rojnamegeran û sivîlan hewldan bên dayîn."

Di daxuyaniyê de hat ragihandin ku Denîz Firat ji bo ajansa ANF, televîzyonên Ronahî TV, Stêrk TV û ÎMC TV nûçe çêdikir û hat destnîşankirin ku ji eniya şer heta sînorê Sûriyeyê der heqê gelek qadan de nûçe diweşand.

Hat gotin ku Denîz Firat ji destpêka êrîşên DAIŞ'ê û vir ve rojnamegera duyemîn e ku jiyana xwe ji dest dide û hat bibîr xistin ku kameramanê El Ahad TV Xalid Alî Hamada di 16'ê pûşperê de li Diyalayê jiyana xwe ji dest dabû.