Gotina pêşî: Ez vê nivîsê ne wekî rojnamegerekî kurd, wekî kesekî ku dengê xwe dide HDP'ê dinivîsim. Navên ku li jêr derbas dibin ne hiqûqek min a menfîetê ne jî rikek min li hemberî wan heye. Min li ser wan nirxandina xwe li gor baweriya xwe kiriye.
Gotina duyem: Lîsteya HDP'ê ne mikemel e, lê ez wekî hinan nikarim bibêjim xirab e. Ligel rexneyên me, sedî sed ev lîste heq dike ku mirov dengê xwe bidê.
Ez dixawzim li ser hin xalan bisekinim. De fermo:
Dogan û Firat
- Hebûna navên wekî Mîr Dengî Firat û Celal Dogan tiştek baş e. Nebûna Hatip Dicle tiştek xirab e. Çima nîn e ez nizanim.
Leyla Zana neba!
- Bi ya min ne hewce bû Leyla Zana careke din wekî berendam bihata nîşandayîn. Rast e, Leyla Zana sembola jina kurd e, rast e, keda wê heye û bi ya min ew jî yek ji "Rûsipî"yên (RÛSPî ji bo mêran tê gotin, lê ev peyvek xweş e, loma min bikar anî) kurd e. Bi ya min wisa bimana baştir bû. Ji ber ku Zana di 5 salên dawî de qet tiştekî nekir, loma ez dibêjim careke din mebûsî heq nekir (hûn dikarin li rûpela meclisê binêrin ka çi kiriye, yan jî nekiriye. Her wiha li qadan jî nîn bû). Li nav kurdan jî zêde tiştek nekir. Hurmeta min ji bo Zana gelek e, lê ev nayê wê wateyê ezê meseleyê rexne nekim.
Bi ya min ji kontenjana Barzanî, bi erêkirina Ocalan careke din bûye berendam.
- Li Amedê bûyîna Nursel Aydogan careke din bi ya min ne di cih de ye. Divê neba. Ew jî ji lîsteya JÊR ketiye lîsteyê.
- Ev tevger ne tevgera xal û xwarziyan e. Bi salan Ocalan wisa got. Gere wisa bidome jî. Lê hin kes ji Ocalan zêdetir xwe Ocalanparêz dibînin. Bi ya min ji ber vê yekê Biraziya Ocalan wekî berendam nîşan dane. Ez wisa dibînim ku ev biryara Tevgera Jinan e, lê xwezî tiştek wisa nekira. Ne ku ez Dilek Ocalan baş nas dikim; mesele ji vê wêdetir e.
Ozsokmenler heq dike
- Yurdusev Ozsokmenler ev zêdetirê 20 salan e di nav têkoşîna kurdên bakur de ye, gelek keda wê heye. Bi ya min mebûsî heq dike, lê ne bajarê Wanê ba dê baştir ba. Ji ber ku ji Hevseroka HDP'ê Yuksekdag (dixwazim bibêjim kesek tirk) jixwe hebû, loma xwezî li bajarekî din bihata nîşandayîn.
- Gelek kêfa min hat ku Feleknaz Uca bûye berendam û dê bê hilbijartin.
- Kêfa min hat ku Ahmet Yildirim (Hîndekarê Zanîngeha Dîcle, endamê RTUK'ê li ser navê HDP'ê bû) berendam e. Li Mûşê 4 mebûs hebûn, 2 me, du jî partiyên din derxistibûn. Vê carê mebûsek Mûşê kêm bûye, 3 mebûsên Mûşê hene û Yildirim di rêza duyem de ye.
Dêrsim
- Li nav hemû bajaran herî zêde berendamên Dêrsimê li xweşa min çûn, ji ber ku Alican Unlu (rêza yekem) jî Edibe Şahin jî bi salan keda wan di nav vê tevgerê de çêbûye. Herduyan jî berendamtî heq kiriye, ez hêvî dikim dê bêne hilbijartin jî.
Tifaq
- Li bajarên kurdan tifaqa kurd, kontenjanên ji wir hatine, li bajarên tirkan tifaqa bi çepên tirk re xwe di nav lîsteyê de nîşan didin. Ji bo yê bajarên kurdan ez nikarim tiştek bibêjim, lê ji bo bajarên tirkan vê bibêjim: Xwezî kesên wekî Ercan Kanar jî heba.
- Di lîsteyê de wekî ku zêde berendamên oldar hebin, gelo ez şaş im.
Yên ku heq dikirin
- Bi ya min gelek kesên din ku heq dikin hene lê di lîsteyê de nîn in. Yên ku bi ya min heq dikirin ezê nav bi nav hinan bibêjim:
Meral Daniş Beştaş: Beştaş di nav vê tevgerê de yek ji jinên jîr e. Neheqî lî hatiye kirin ku li Edeneyê di rêza duyemîn de ye. Beştaş heq dikir ku di cihek di rêza yekemîn de be. Hinek neheqî lê bûye. Ez hêvî dikim dê bê hilbijartin û ev neheqî ji holê rabe.
Nejdet Atalay: Atalay wekî Şaredarê Batmanê hat hilbijartin, lê nehiştin karê xwe bike. Çar salan ji "Doza KCK'ê" girtî ma. Bi ya min heqê wî hebû ku wekî berendam bê nîşandayîn
Ali Urkut: Urkut ji Rêxistinkirinê Berpirs Cîgirê Hevserokên Giştî ye. Ji nav rêxistinê tê. Bi salan Serokatiya Rêxistina Amedê kir. Çima ew nekirine berendam min fêm nekir.
Kemal Pekoz: Pekoz bi ser 20 salî re ye di nav vê tevgerê de ye, di nav gelek komîsyonên hilbijêr de cih girtiye, gelek ked daye. Hê jî endamê Meclisa Partiyê ye. Li Stenbolê birine di rêza 9'emîn de nîşan dane. Ez şaş bûm. Wî rêzên yekemîn heq dikir.
Cemal Coşkun: Herî dawî nûnerê partiyê yê Hewlêrê bû. Ew jî bi ser 20 salî re ye di nav vê têkoşînê de ye. Dixwest bibe berendam jî.
Mustafa Avci: Avci, niha endamê Meclisa Partiyê ye. Di hilbijartina din de ji bo têkçûnek çênebe ji bo Levent Tuzel bi paş ve vekişiya. Vê carê bi ya min heqê wî hebû.
Culemêrg, Şirnex
Niha jî em hinek li ser bajaran bisekinin:
Li Culemêrgê cara din rewş 3-0 bû, ez hêvî dikim dê vê yekê dubare bike û ji Şirnexê jî hêviya min a 4-0'ê heye.
Dara Turhan* qala 3-0'iya Sêrtê dike. Qewlê pîra min re: "Bila dengê te biçe Xwedê."
Amed ji 8'an kêmtir mebûsan derxe ezê ji Amedê îstîfa bikim.
Batman 3-1 be dê gelek baş e, de ka...
Heqê me ye ku em ji Rihayê jî li benda hejmarek baş bin.
Stenbol dixebite. Hevserokên Stenbolê Cesim Soylu jî xanim Ayşe Erdem jî dixebite. Ka Stenbol dê bersivek çawa bide, em dê binêrin.
Gotina dawî: Bi xêr û guneyên xwe lîsteya berendamên mebûsiyê ya HDP'ê pîroz be. Pêdivî pê heye her kes bi qasî du qatî hêza xwe bixebite û bendavê tar û mar bike. Ez wisa hîs dikim ku dema bendav tar û mar bibe piştî wê pêvajoyê dê hinek hindiktir kurd bimirin. Lê bendav têk neçe mixabin tirsa min ew e ku zêdetir kurd dê bimirin.
Ha, ez vê jî bêjim: HDP bendavê derbas neke dê ji bo min surprîz be, lê bi ser bendavê re her pûanek ku bigire ji bo min ne surprîz e. Lê xebat, xebat û careke din xebat divê.
.jpg)
