Çi eleqey ma Dortmundî ra esto? Dortmund çi yo, çi karî keno? Bêrê ma eyro serê sporî ra bawnê rewşa welatan ra. Nimûnaya ma Dortmund a…
Dortmund klûbey sporî ya alman a. Di lîga pîle ya Almanya “Bundesliga” de kay kena. Namey klûba bi temamî anawo: “Ballspielverein Borussia 09 e.V. Dortmund”. Bi kilmî tera vanê Borussia Dortmund, yan zî Dortmund tenî. Serey 1909î de hamiya viraştişî. Ma eşkenê vacê klûba pîle ya diyine a Almanya ya. Bundeslîga de 5 rey biya şampîyone. Tûrnûvayanê miyanê dewletan de zî şampîyoniyê cay estê, zey “Şampîyonê Lîgê Şampîyonan”, “Kûpay UEFA” û serkewtinê aneyînî.
Tîma pîle ya Almanya Bayer Munih a. A di Bundesliga de tam 30 rey biya şampîyone ke dimay ay ra Dortmund yena. Dortmund bî çende serî zey emsarî dimay Bayer Munihî ra lîg zey diyin temam kerd.
Spor, bi taybetî zî fûtbol raverşiyayîşê welatan nîşan dano. Mesela welatê tepiya mendê, mesela Iraq, mesela Sûriye, Lubnan, mesela Pakistan, welatanê anayînan de ma fûtbolî nêvînenê. Welatê ke zehf raver şiyê de ma fûtbolêke raver şiyo zî vînenê; xeynî fûtbolê mêrdan, fûtbolê pêrekan zî esto. Mesela tîmê fûtbolî yê neteweyî yê pîrekan, ê Hollanda zî, ê Almanya û Fransa zî estê.
Fûtbol perewo, bi pereyan yeno kaykerdişî. Fûtbol hem hetê çandî ro raverşiyayîşê ê welatî, hem zî hetê aborî ro raverşiyayîşê welatî nîşan dano. Meselaya ma ya eyro zî awa. Loma ma Dortmund zey nimûne nist.
Dortmund ke diyin tîmo pîl ê Almanya wo dimay 10 seran ra, emsar rey joyînan zirar mot ra. Eno 10 serrîyo klûbe her pere kar kerdê. Emsar pandemî bandorê xo serê heme welatan de, serê fûtbolî de zî naro û semedê ene joy Dortmundî dimay 10 seran va ke ma emsar zirar kerdo. Tam 44 mîlyon Euro zirar nîşan da. Klûbe serrêke verê 17.4 mîlyon Euro kar kerd bî.
Ger klûbêk almane zey Dortmundî zî zirar kerdo se xo ra merdim eşkeno texmîn bikero welatê zey Tirkiya çi rewşe de ya. Yê joyîn ra bigîre heta taximo qickek, heme taximê fûtbolî ê Tirkiya nêşkenê binê deynan ra wirzê we. Dewlete bi zor înan serê lingan de gêna. Heta kînga?
Ger ma vacê halê kurdan çi yo? Kurdî eno het de xo ra çiniyê zî. Kurdî bi temamî hema nêşkenê wayîr ro Amed Sporî veciyê. Û Başûrê ma ke bi awayê fermî wayirê statuyo, ew ca tîmê fûtbolî zî biyê vila, çiniyê.
Erê, bi rehetî ma eşkenê vacê ke welatê raver şiyê fûtbolê cînan xurt o. Rocêke ger zey Barsolenaya Katalanan tîmêkey kurdan virazîyo, dinya de veng bido a çaxî ma go beşkê vacê kurdî zî hem hetê çandî hem zî hetê aborî ro raver şiyê. Marê hema zehf dem lazim o. Her ke meseleya Dortmundiya, ay rê pirsgirêk çiniyo, emsar zirar kerd, serrêna go reyna kar bikero.
Ev nişte di rojnameya Xwebûn de hamiya neşrkerdin
.jpg)
.jpg)
.jpg)
