Hekîm Sefkan / Tava Heyvê

Li gor ku ez wateya peyva klasik dizanim, ew wekî çîn, beş, sinif, kom tê bi karanîn, li aliyê din li gor hinek zimanên ewropayî tê wateya herî baş, wekî nimûne dema ku alman tiştekî baş dibînin dibêjin klasse. Helbet li gorî zimanê berê, tenê ji çîna bilind a burjiwazî re dihat gotin kals, ji ber vê yekê jî dema alman dibêjin klasse, yanî tiştekî bilindbuha ye...
Di wê demê de jî tenê wan karibû li muzîka bilind a senfonî guhdar bikira, wekî îro teknîk tune bû ku her kes li her deverê karibe guhdar bike, ji bo guhdarkirinê mirov mecbûr bû li salonan, zindî guhdarî bike, wekî din ku plak-sêl yan jî aleteke din heba jî, dîsa tenê wê çinê karibû bi hawanda, loma jî navê wê stila muzîkê bûye klasik...ew ne ji ber ku kevn e, lê belê ji ber ku tenê bûbû para wê klasa bilind ew nav lê bûye û heya vê rojê ew nav berdewam e...
Baş e, çima em ji stranên civatan re dibêjin klasîk, ev peyv ji ku hatiye? Ez jî nizanim, lê ez dikarim bibêjim ku navê wan stranên ku em dibêjin klasîk in, stranên civatan in. Hinek dikarin bêjin ku her ew stranên me jî, wekî yên Rojava ji çîna bilind re hatine gotin, ji axan û serok eşîran re...lê ku mirov li naveroka wan stranan guhdarî bike, bêhtirên xwe li ser mirovên feqîr in, bêhtir evîna wan, yan jî qehremaniya wan tînin ziman ku li ser axayekî hebe jî, ne hemû lê bêhtirên wan bi pereyan hatine çêkirin, ev nimûne gelek in, heta hinek jê çewt hatine kirin, ew axa ji bo tiştekî din hatiye kuştin, lê malbata wî, pere dane dengbêjan û wan ew kirine qehreman?!
Werhasilî, bikaranîna peyva klasîk ji bo wan stranan tişteke şaş e. Hûn çi dibêjin?
Tiştekî din, ez nizanim bê wateya Hip-Hop bi zimanên din çi ye, lê dema mirov li sedemên derketina wê dinêre-reşikan li şûna çekan, bi vî stilê “stran”a şerkirinê, li hemberî eniya dijber radiwestin-her wiha dema mirov li rengê bi karanîna Hip-Hop dinêre, ew di civaka kurdî de tiştekî pir kevn e...
Di hundirê malan de dema ku zarok pir dibûn û her seriyek dengek jê derdiket û sedî sed dibûn du bend, mezinan digotin; Bes e hop-hop a we, li hinek deveran Hoq-boq-li hinek deveran jî hir-hop tê bi karanîn, dibe ku hin gelek navê din li hermên cuda lê bibin, lê her ew wekî Hip-hop bi kar tînin.
Ne tenê zarok, her wiha dema ku gundî diketin şer ê gotinan, caran jî digihan dereceya pevçûnê, mêr di şer de bûn, jinan jî nav di wan dida, dilîlandin, lê dema mirov wan dîmenan bîne ber çavên xwe, di nava wî şerî de solîst,vokal û dîlan hene...
Bê guman ew kesê ku wekî solîst di nava wî şerî de cih digirt, yê herî ku mirov hêbet ji dengê wî digirt, yanî dengê ku yê hemberî xwe netirsîne, nikare bibe solîstê Hip-Hop,Hoq-boq yan jî Hop-hop ê.
Dibe ku nav û stila vî şerî li her deverê wekî hev be.
Ez dibêjim ku peyva: Hip-Hop ne çanda me ye, şaş e, ew çanda her devera ku dubenditî lê hebe ye.
Hûn dibêjin çi?

hekimsefkan@hotmail.com