Raste rast mesele ev e: KONDA sipasiyê heq dike. Yên ku KONDA’yê rexne dikin neheq in. KONDA’yê gelek tişt derxistin holê û ji ber vê yekê jî dê lêkolîna wê hê demeke dirêj di rojeva me de be.
Ger we di Milliyetê de nexwendibe jî dibe ku we di Diyarnameyê de dîtibe. Ger we nedîtibe jî bi kurtahî ez bibêjim: KONDA’yê di bin berpirsiyariya Tarha Erdem de lêkolîneke kir û bi navê “Em kî ne?” hefteyekê wekî rêzenivîs di rojnameya Milliyetê de weşand. Ji ber vê yekê Komeleya Ramanî ya Ataturkparêz a Amedê ji dozgeriyê xwest ku rêzenivîsê bide rawestandin û der barê Erdem de doz bê vekirin û ew bê darizandin.
Ji eniya kurdan jî wê rojê min dît nivîsakerekî me gotiye; “Ev çend roj in ku ji bo kurdan bêjeyeke xeternak tê bilêvkirin û nivîsandin: ‘Kurd-Zaza’” û rêzenivîs rexne kiriye.
Lê bi ya min ev nêzîktêdayîneke ji rêzê ye. Ev nêzîktêdayîn ji rastiyên Tirkiyeyê û kurdan dûr e.
Ez dibêjim: KONDA û Tarhan Erdem sipasiyan heq dikin.
Ji ber çi?
Ji ber ku;
- Wan di lêkolîna xwe de derxist holê ku “Li Tirkiyeyê 11 mîlyon û 445 hezar kurd dijîn.”
Heta niha gelek tirkên neteweperest digotin ku li dor 6 mîlyonî kurd li Tirkiyeyê dijîn. Hejmara ku KONDA’yê derxist holê, ev fikir têk bir.
Bêşik kurd dibêjin hejmara kurdan li Tirkiyeyê li dor 20 mîlyonî ye lê ka li gor kîjan lêkolînê? Hîç!!
Heta lêkolîneke baştir neyê kirin, hejmara têkûz dernekeve holê, ev reqem reqemeke baş e.
Wisa bifikirin: Ger 11 mîlyon û 445 hezar kurd li Tirkiyeyê dijîn, gere navê wan li zagona bingehîn jî hebe, gere mafên ên din jî hebin.
Ji ber ku;
- Lêkolînê derxist holê, “Sedî 89,5 kurd perwerdehiya zimanê zikmakî dixwazin.”
Ev reqemeke gelek girîng e.
Ger ji nava gelekî sedî 89,5'ê wî gelî di lêkolînekê de qala perwerdehiya bi zimanê xwe yê zikmakî dike, ev yek dibe ferz li ser rayedarên vî welatî ku vê daxwazê bînin cih.
Heta niha kesî hejmareke wisa derxistibû holê? Na. Bêşik ev nûbûneke, bêşik bi vê lêkolînê rayedarên Yekîtiya Ewropayê (Ku li gelek welatên YE’yê du ziman zimanên fermî ne) jî rayedarên welatên din jî êdî baş dizanin ku kurd çi dixwazin.
Ji ber ku;
- Li gor reqemên fermî yên Saziya Îstatîstîkî ya Tirk (TUÎK) 11 mîlyon û 622 kes li Stenbolê dijîn, di nav van de, li gor lêkolîna KONDA’yê mîlyonek û 571 hezar kes kurd in. Li gor TUÎK’ê li Amedê 618 hezar kurd dijîn (Em qala reqemên ne fermî yên li Amedê û Stenbolê nakin)… Li gor vê, Stenbolê bajarê herî mezin ê kurdan e. (Bêşik em gotina Prof. Baskin Oran a ‘Li Stenbolê 3 mîlyon kurd dijîn’ ji bîr nakin).
Ger Stenbol bajarê herî mezin ê kurdan be barekî mezin dikeve ser milê kurdan. Kurd divê ji her alî ve xwedî li vî gelî derkeve. Xwedî li kurdên Stenbolê derkeve. Rojnameyeke wekî Azadiya Welat ku rojane der diçe, divê buroyeke wê ya mezin li Stenbolê jî hebe, lê nîn e. Divê televîzyon û kovarên me bi vî awayî giraniya xwe bidin Stenbolê jî. Û hwd.
Ji ber ku;
- Lêkolînê derxist holê ku: Yên ku dibêjin "Ez kurd im" ji tirkan zêdetir girîngî dide nasnameya xwe.
Ev xaleke gelek balkêş e.
Ev yek diyar dike ku kurd hê jî û bi awayeke xurt xwedî li nasnameyê xwe derdikevin.
Ji ber ku;
- Lêkolînê derxist holê ku li Tirkiyeyê sedî 84,54 wekî zimanê xwe yê dayikê 'tirkî' dibînin, sedî 11,97 zimanê xwe yê dayikê 'kurd' dibînin, sedî 1,01 zaza dibînin.
Û li gor vê reqemê gere mafê perwerdehî yê sedî 12’î hebe.
Vê yekê diyar kir ku ev sediyeke heye ku mafê perwerdehiyê dixwaze.
Li welatê pêşketî îstatîstîk û lêkolînên wisa gelek girîng in. Û ev lêkolîn dê tesîrê li ser kurdan jî, li ser welatên biyanî jî bikin.
Her ku kesek rabe li ser kurdan tiştekî bibêje, dê ev reqem derkevin pêş wî/ê. Ev reqem dê demeke dirêj hê di nav jiyana me de bin.
Ha nivîskarê me yê ku me jor qal kir, çûye bi dû “Çima di lêkolînê de gotiye ‘kurd’ û ‘zaza’” ketiye.
Ê heyran di nav kurdên te de zazayên (kirmanc) ku dibêjin em ne kurd in (hejmara wan çi dibe bila bibe) hene, çi sûcê vê lêkolînê heye… Bêşik di gelek cihên lêkolînê de jî ew wekî hev hesibandine, yan jî hejmara wan daye ser hev û hesabeke kiriye. Bi ya min ev jî aliyekî erênî ya lêkolînê ye.
Ez wekî rojnamegerekî kurd ji ber ku îstatîstîkên wisa pêşkêşî me kirin sipasiyên xwe pêşkêşî KONDA, Tarhan Erdem û bêşik Milliyetê jî dikim.
.jpg)
.jpg)
