16 roj heyvek neke jî dinya di geryana xwe de digere, zeman di delavê xwe de diçe, diherike...
Û roj ji kîsî kê naçe xwar, bi hesabê kê hilnayê?
Jixwe gotine, ‘rojên bi jimar diçin bixar’!*
Ez jî ji Silêmanî hê nû vegeriyabûm, û bivê nevê ji ber xirepiş û xirêqetiya Festîvala Gelawêj ji rojeva li Bakûr; ji rûdan û qewimînên civakî, siyasî dûr ketibûm.
Ez dûr biketima jî, rojeva herî germ û giyanewer mijara hilbijartinên herêmî bû, û ev babet ne bi girtina sucdarên nû ê Ergenekonê dikaribû sar bibe, ne jî bi pistepista vekirina kanaleke kurdî.
Û weke ku tê zanîn bi serîlêdana fermî ji Rektoriya Zanîngeha Dicleyê hatibû xwestin ku di Zanîngehê de beşa Kurdolojiyê bêt vekirin.
Ev serîlêdan di serî de Baroya Amedê; ji hêla saziyên şarewar yê li bajêr hatibû kirin û ji layî Baroyê ve ji nêz ve dihat şopandin.
Di hevdîtinekê de me got, di vê biwarê de weke Komeleya Nivîskaran çi bikeve ser milê me em amade ne.
Lê weke gotina yê mitirb, ‘ Ez li kû didim, ew ji kû der dibe’ TRT6 a ku cenahê kurdan kir TV8, ji nişkê dest bi weşanê kir, û piştî vê ‘teqemeniyê’, bi destê (YOK): Serokê Saziya Xwendina Bala du ‘tnt’ di binê hîmê dewletê de hatin bicihkirin: Me dil heye di destpêkê de li Zanîngehên weke Ankara û Stenbol, ku di vê mijarê de xwedî-rabirdû, xwedî-serpêhatî û ezmûn in Beşên Kurdolojî vekin!
De werin… û xwe gez nekin!
De werin… û nekin hewar!
Di vê qeryana aborî ya ku pêyê Emerîkayê xistiye soleke teng de va xêr e, va şer e?
Ji layekî ve xêr be jî, li layî din ve şer e!
Û niha jî vê kêlîkê şer e li ser ‘axa muhtelle’!
Û kurd mecbûr in ji bilî çekê, xwe amedeyî ‘çekin’ din, ‘şerin’ din bikin!
Piştî evqas xwîna herikî, min baş dizanî ku ev ‘tir ji wan mişkan re namîne’!
Lê, di serî de kurê min ê ku li Zanîngeha Duhokê beşa Zimana û Wêjeya Kurdî dixwîne ji min bawer nedikir ku ev ‘tir dê ji mişkan re nemîne’!
Hê jî dê nemîne!
Ji ber ku ev ‘nînna’ ye; ‘tirnînna’ li dû ye!
Bi qasî ku di vê biwarê de her kes; zana nezan, rojenbîr roşenkwîr, nivîser nivîsser…her kes xwedî maf e ku ya xwe bilêvîne, bibêje; ji mafê min e ku ez jî ya xwe bibêjim:
Siyaset miyaset; TRT6 û vekirina beşên Kurdolojiyê şikestina ji sê pêyan pêyekê dewletê ye: Yek ziman, yek al, yek welat û netew!
Ziman têk çû, neçû?
Bi min têk çû!
Ma çi?
Ma yek al û yek welat/netew!
Weke ku her neteweyê xwedî-al û welat; ala kurdan jî heye, welatê wan jî!
Û jixwe li ser axa xwe dijîn:
Ji bilî 5 milyonên ku li vir û wirê Tirkiyeyê belav bûne, û li vir û wir bi navê kurdan bi paye, û qurre bûne:
Yê ku bibêja ya te qurretî ye; ji kerema xwe bila li rojnameya Zaman**ya duhî meyzêne ka kî qurre ye; û kî dixwaze bibe ‘cebara’ pêyê şikestî!
*Ev ne biwejêke pêşiyan e; min bi xwe li hev anî.
**Zaman10/01/09
11/01/09/Amed
.jpg)
.jpg)
