Berî her tiştî ez bêjim: ez ji Şivan Perwer û Îbrahîm Tatlises hez dikim. Di nav hemû hunermendên kurd û yên ne kurd de, herî zêde ez ji wan hez dikim. Vê hezkirinê kir ku ez lêkolînek li ser wan bikim. Min kir... Gelek taybetiyên wan ên wekî hev derketin holê... Hûn dixwazin em bi hev re lê binêrin...
Ev nivîs di dema konsera Îbrahîm Tatlises a ku tevî Orkestraya Senfoniyê dabû di binê bîra mêjiyê min de wekî ava ku xwe bavêje derve, derket holê. Min li gelek berhemên Tatlises guhdarî kiribû, lê bi awayekî zindî nebûbû qismet ku ez lê temaşe bikim, biçim konsereke wî. Ez çûm û bingeha vê nivîsê derket holê. Min hê bi awayekî zindî li Şivan Perwer guhdarî nekiriye, ez hêvî dikim rojekê ezê li wî jî guhdarî bikim.
Niha em vegerin ser nivîsa xwe.
Piştî ku ev fikir derket holê, û bêşik ji ber hezkirina min a li hemberî hunera her duyan, min dest bi lêkolînê kir û min dît ku gelek taybetiyên wan wekî hev in.
Fermo ji we re çend xal:
1- Her du hunermend jî li Rihayê hatine dinê, ji ava wir vexwarine, bi navê wir têne nasîn, ewder jî êdî bi navê wan...
2- Her duyan jî di zarokatiya xwe de dest bi lêdana tembûrê kiriye. Dema Şivan Perwer yekem car tembûr biriye mal bavê wî hêrs bûye û gotiye, "Tuyê bibî mirtib?".
"Mirtib" ku di nav çavê kurdên wan deran de di asta biçûk de bûn; Îbrahîm Tatlises jî bi çavekî din, di nav civakê de biçûk hatiye dîtin.
3- Her du jî gelek caran evîndar bûne.
Li ser vê Perwer qet xeber nade. Di pirtûka "Bir dunya ozani Şivan Perwer (Nivîskar: Salihê Kevirbirî, Weşanên Elma)" nivîskar dibêje; "Şivan Perwer di jiyana xwe de gelek caran evîndar bûye, lê qal nake. Vê wekî magazînê dibîne." (Der barê hezkirina Şivan Perwer de, di berhemê navborî de agahî hene. C.O)
Tatlises jî gelek caran evîndar bûye, lê ji ber ku ew her li ber çavan e û çapemenî her li dû ye, ev yek zêdetir xwe nîşan dide.
4- Jinên her du hunermendan ên yekem ji Rihayê ne û her duyan jî dev ji jinên xwe yên yekem berdane û jinên duyem anîne.
5- Her duyan jî li bajarên xerîb dest bi hunermendiya profesyonel kiriye û her du jî li bajarên xerîb (yanê ne bajarê kurdan) bûne navdar.
6- Her duyan bi tirkî dest bi hunermendî kiriye, Şivan bi temamî vegeriyaye ser kurdî, Îbo carinan bi kurdî dibêje...
7- Her du jî bi kurtenavê xwe têne nasîn. Li cihekê dema mesele muzîk be û yek bêje, "Şivan" tê fêmkirin ku qala Şivan Perwer tê kirin. Dema yek bêje, "Îbo" tê fêmkirin mesele Îbrahim Tatlises e.
8- Her duyan jî bi têra xwe li hunermendên herêmî guhdarî kirine û dikin. Şivan Perwer, ji Mihemed Arifê Cizrawî bigire heta Kawis Axa li dengbêj û stranbêjên kurdan ên klasîk guhdarî kiriye, ji wan gelek tişt girtiye; Îbrahîm Tatlises jî gelek li hunermendên herêmî yên wekî Kazanci Bedih û yên din guhdarî kiriye û ji wan gelek tişt girtiye.
9- Her duyan jî deng daye kîjan stranê, ew staran bi nav û deng bûye û ketiye nav dilê guhdaran. Û êdî ew wekî strana wan di nav civatê de hatine nasîn; Ew û stran bûne yek.
10- Yê her duyan jî stranên wan ên klasîk hene, piştî salan her ku ew wê stranê distrên, careke din guhdar dixwazin guhdarî bikin. Wekî "Kîne em", "Xezal", "Nazê" û hwd. yên Şivan Perwer, yê Îbrahîm Tatlises jî yên wekî "Ayaginda Kundura (Her çiqas straneke kurdî be û ji bo tirkî hatibe wergerandin jî, bila be, bi tirkîtî navê stranê derket)", "Sabuha" û hwd.
11- Her duyan jî heman stran xwendine di nav hunermendiya xwe de û ji her duyan jî hatine hezkirin; lê yekî bi kurdî, yê din bi tîrkî xwendiye. Wekî mînak: "Canê Canê", "Yek mûmek (Bir mumdur)...
12- Di nav terîmên muzîkê de ji bo pîvana deng "oktav" tê gotin. Nehatiye pîvan ku oktava dengê wan çend e, lê li gor gelek kesên ku dibêjin û li gor çavdêriya me pîvana dengê her duyan yek e.
13- Di nav kuçeyan (hema hûn kîjan kuçeyê dibêjin) de dema dengê ji wan yekî were, miheqeq kurd guh lê bel dikin. Ger karê wan nîn be, miheqeq li benda dawîlêhatina stranê disekinin, ger kar hebe jî, miheqeq bi stranê re çarînek wê dibêjin, bi vî awayî dimeşin.
14- Her du jî mirov nizane piştgirê kîjan partiyê ne... Navê her duyan jî di nav gelek partiyan de hatiye qalkirin ku beşdarî wan partiyan dibin, lê beşdarî yekê jî nebûne û kes nizane niha ew ji kîjan partiyê hez dikin. Lê rastiyeke wisa heye: Ji her partiyê hezkiriyê wan hene; Ji her partiyê yên ku ji wan nefret dikin jî hene.
15- Her du jî xwe bi ser partiyan re dibînin... Her du di gotinê de, dixwazin hunera wan li pêş be.
16- Performansa wan a li ser dikê, ya konserên zindî mikemel e. Min Îbrahîm Tatlises bi zindî, di konserê de lê temaşe kiriye û performansa wî ez têr kirime, lê yê Şivan Perwer min tenê di televîzyonê de bi zindî lê temaşe kiriye, ez dikarim bêjim, ez di nav heman hestê de bûm. (Ji bo Şivan Perwer, ez dikarim konsera wî ya li Yewnanistanê ku di televîzyonê de zindî hat weşandin, mînak dibim).
Belê... Ez ji her du yan hez dikim, ez hêvî dikim, ewê rojekê di konserekê de bi hev re bi kurdî û tirkî Canê Canê bistrên û ezê jî li wan guhdarî bikim. Ewê bi hev "Kîne em" bibêjin û ezê jî beşdarî wan bibim ji nav guhdarên ku niha ez tenê xeyal dikim...
Ez ji organîzatorên me rica dikim rojeke wisa pêşkêşî me bikin.
Û ez hêvî dikim her du jî wê temenekî gelek, gelek dirêj bijîn.
.jpg)
.jpg)
