Diyarname

Çapemeniya kurdan gelek caran bi gotegotên têne ber guhan nûçeyan li ser masê amade dike. Gelek rojnamegerên van nûçeyan amade dikin zehmetê nadin xwe ku teknolojiya heyî ya nûjen jî ji bo piştrastkirina gotegotan ku dikin nûçe bikarbînin. Rojnameya Bas ku tevna wê ya nûçegihaniyê gelekî berfireh e, vê carê mizgînî da ku jineke kurd bûye şaredara navçeyeke paytexta Almanyayê Berlînê. Lê rewş tam ne wisa ye û gelek tevlihev e.

Nûçeya bi îmzeya Dîlan Almaz ku roj 03.10.2016’an di Basê de hat weşandin, bi sernivîsa “Helin Evrim Baba: Ji Berlînê re şaredareke jin a kurd” derket. Nûçe wiha dest pê dike: “Parlamentera Eyaleta Berlînê Helin Evrim Baba di hilbijartina 18’ê rezberê de wekî şaredara navçeya Lichtenberg a Berlinê hat hilbijartin. Baba hem wekî jin û hem jî wekî esil- biyanî yekem car e dibe şaredara Lichtenbergê.”

Hevokên li jor kelecaniyê bi mirov re çêdikin. Kesên nûçeyên bixwîne û rewşê nizanibe jî dê kêfxweş bibe. Lê belê kesekî ji rewşa siyasî ya Lichtenberg a Berlînê agahdar be dê ber xwe bikeve ku nûçeyeke bi vî rengî ji rastiyê dûr ji xwendevanên kurd re tê weşandin. Di hevokên jor ên nûçeya Basê de ji bilî ku hilbijartinên herêmî di 18’ê rezberê de pêk hatine, parlamanentera eyaleta Berlînê ye û Lichtenberg navçeyeke Berlinê ye, agahdariyên din mixabin hemû ji rastiyê dûr in.

Em ji nav dest pê bikin; Paşnavê Helin Evrim ne “Baba” ye lê “Sommer” e. Ew di sala 2009’ê de bi dîroknas Dr. Robert Sommer re zewicî û paşnavê wî wergirt. Ji ber vê egerê paşnavê wê di fermiyetê de êdî ne “Baba” lê belê “Sommer” e. 

Xala din jî ew e ku tê gotin Helin Evrim Baba cara yekem e wekî jin li Lichtenbergê dibe şaredar. Em dûr neçin, şaredara niha ya vê navçeyê ku ji sala 2015’ê ve li ser hikum e, bi xwe jin e û navê Birgit Monteiro ye.

Em vegerin ser xala sereke ya ku bû sedem em vê nivîsa rexneyî binivîsin; Helin Evrim Sommer ango ji qewlê Basê ve Helin Evrim Baba wekî şaredara navçeya Lichtenbergê nehatiye hilbijartin.

Di hilbijartinên 18’ê rezberê de partiya Sommer, “Die Linke” ango “Partiya Çep” ew wekî namzeta şaredariyê danî. Die Linke bi sedî 29,8’ê dengan bû partiya yekemîn. Lê ev deng têra ku şaredariyê bistînin nakin. Divê yan “Die Linke” bi partiyeke din re koalisyonê bike û yan jî partiyên din bêyî koalîsyon piştgiriya wê bikin heta ku Helin Evrim Sommer bibe şaredar. Niha hevdîtinên Die Linke bi partiyên din re dewam dikin.

Rojnameya Basê di 2014’ê de jî diyar kiribû ku siyasetvana esil-kurd Berivan Aymaz di hilbijartinên herêmî yên 25’ê gulana wê salê de wekî şaredara navçeya Mullheim a bajarê Kolnê hatiye hilbijartin. Vê nûçeyê dengekî bilind di nava kurdan de vedabû lê belê ev nûçe jî rast derneketibû. Aymaz di wê hilbijartinê de ji dengên taxê wekî parlamentera meclisa bajêr hatibû hilbijartin û hêjî vî karê xwe berdewam dike.     

**

Nivîsên li ser "Çapemeniya Kurdan":

- Derewa rojê ev e: Fotoyê balafirgeha li Hesekê! 

- Bi 6 nûçeyan têkçûna çapemeniya kurdan