Diyarname

Piştî çend salên navberê û pandemiyê kovar û Komeleya Nûbiharê careke din xwarina fitarê da nas û dost û nivîskarên xwe. Gerînendeyê Weşanê yê Nûiharê Suleyman Çevîk got, “Bila kurd tifaqa xwe çêbikin.”

Kovara Nûbiharê ji sala 1992’yan ve weşana xwe didomîne û îsal 30’emîn salvegera wê ye. Ji wê demê ve Weşanxaneya Nûbiharê jî bi çapkirina pirtûkên bi kurdî xizmetê dide kurdî. Ligel van, di van salên dawî de Komeleya Nûbiharê jî hatiye vekirin û di serî de dersa kurdî, ew jî di hin waran de xizmeta kurdî dike. Koma Nûbiharê vê êvarê xwarina fitarê da nas, dostên xwe û nivîskarên kurd. Nûbiharê bi salan ser hev de di meha Remezanê de xwarina firatê dida lê hem ji ber pandemiyê hem ji ber rewşa kurdan ev çend sal bûn ev xebat nedihat kirin, îsal careke din xwarina fitarê hat dayîn. Çalakiya dayîna xwarina firatê li Tesîsa ÎBB ya li Avcilara Stenbolê li dar ket û bi sedan kes beşdar bûn. Gerînendeyê Weşanê yê Kovara Nûbiharê Suleyman Çevîk ji bo xêrhatinê derket pêşberî mêvanan û axivî. Çevîk qala qebatên li ser kurdî kir û got ku ji bo kurdî bibe xwedî perwerdehiyê divê xebat bê kirin, em jî di vî warî de dixebitin. Çevîk wisa got, “Gere em qîmetê bidin zimanê xwe, zimanê xwe biparêzin, divê ji zimanê xwe hez bikin.”

Çevîk qala têkiliya kurdan a navxweyî jî kir û got, “Pêşî kurd divê tîfaqa xwe çêbikin. Divê kurd ji hev hez bikin, menfeetên xwe yên şexsî nedin pêş, menfeetên netewî bidin pêş.” Çevîk sipasiya her kesê hatiye şevan wan kir.

Dûre ji Weqfa Zehrayê nivîskar Mihyiddin Zinar bi kirmankcî (zazakî) û bi tirkî axivî û sipasiya kesên hatine kir. Di şevê de dûre bi kurdî îlahî hatin xwendin û mêvan piştî xwarinê ketin nava dan û standinê.