Diyarname

Mebûsa Yeşîl Sol Partî (YSP) ya Wanê Gulcan Kaçmaz Sayyîgît bi kurdî pirsiyarnameyek da Serokatiya Meclisa Tirkiyeyê. Lê meclisê ji ber kurdî ew bi paş ve şand.

Mebûsa YSP'ê Sayyîgît 14'ê mehê li ser perwerdehiya bi kurdî pêşniyarnameyeke da Meclisa Tirkiyeyê. Pirsiyarname bi sernavê "Ji Serokatiya Meclisa Gel a Mezin a Tirkiyeyê re" hatibû dayîn û têde wisa hatibû gotin, "Ez dixwazim ku Wezîrê Perwerdehiya Neteweyî Yusuf Tekin pirsên min ên jêr li gorî benda 98'emîn a Makezagonê û li gor bengên 96'emîn û 99'emîn ên Rêziknameya Navxweyî ya TBMM'ê wekî nivîskî bibersivîne." Lê meclisê ji ber zimanê wê bi kurdî ye rojek paşê, yanê 15'ê mehê pirsiyarname bi paş ve li Sayyîgît vegerand.

Di pirsiyarnameyê de li ser serdema nû ya perwerdehiyê ya li Tirkiyeyê hatibû sekinîn û daxwaza perwerdehiya bi kurdî hatibû kirin.

Sayyîgît bi ser hesabê xwe yê tora civakî re got ku dîsa wekî zimanê "X", "Zimanê nayê zanîn" nêzî kurdî bûne, pirsiyarnameya wê bi paş ve şandine û got, "Perwerdehiya bi zimanê zikmakî û di Zagona Bingehîn de ewlehiya vê yekê daxwaza sereke ya her kurdî ye. Ji ber vê yekê divê zûtirîn gavê de astengiyên li pêşiya zimanê zikmakî bêne rakirin. Divê gelê kurd bi zimanê xwe perwerdehî bibînin û xizmetê bigirin. Cihê ku rê li ber van yekan bê vekirin jî Meclisa Tirkiyeyê ye. Di Serdema 28'an de êdî divê dest ji eyba 'Zimanê nayê zanîn' berdin."

Sayyigit gok ku saziyên dewletê hê jî nehatina asta ku pirsiyarnameyeke bi kurdî fêm bikin û got, "Bêyî fêm bikin, bêyî hewldana fêmkirinê hebin, bêyî zimanê gelekî bê nasîn nîqaşa li ser Zagona Bingehîn a nû çiqas mimkûn e? Wezîrê Perwerdehiya Neteweyî di her warî de fikrên xwe tîne ziman çima daxwazên ji bo zimanê zikmakî piştguh dike? Divê dest ji nêzîktêdayînên îdeolojîk berdin, bi awayê însanî, ehlaqî û pedagojîk li zimanê zikmakî binêrin."

Sayyigit di dawiya peyama xwe de gotiye ku kurdî hebûna me ye, wekî nan û avê pêdiviya me pê heye û xeta me ya sor e.