Diyarname 
Kovara Psychology Kurdî kovara derûnînasiyê ye û çar mehan careke derdikeve. Kovarê di hejmara xwe ya 18'an de dosyaya xwe li ser "Têkilî û Malbat"ê saz kiriye.
Niha hejmara kovarê ya mehên rêbendan, reşemî, adar û avrêlê li ber desten xwendevanan e. Di dosyaya kovarê de Jan îlhan Kizilhan li ser "Têkiliya malbatî, tenduristî û travmaya nifşguhêzî" nivîsa xwe amade kiriye. Li ser têkiliya nav malbatê, bandora li ser wan sekiniye û dibêje, "Kesên ku ji endamên malbata xwe piştevaniyê dibînin, dibe ku xwerêzdariyeke zêdetir tecribe bikin û ev xwerêzdariya zêde bibe çavkaniyeke derûnî ku xweşbîniyê, hestên erênî û tenduristiya zihnî ya çêtir derdixe pêş."  
Gulperî Gunduz li ser "Şîdeta nav malbatê û zarok" nivîs nivîsiye û dibêje, " Şîdeta li nav malbatê, binpêkirinek ji mafên mirovan e, li temamê dinyayê tê jiyîn û bi faktorên çandî, olî, civakî, aborî re sînordar nîn e ango di her çand, ol û civakê de heye." Enver Îlerî bi nivîsa xwe ya li ser "Ragihandina navmalbatî û serkeftina dibistanê" di kovarê de cih girtiye.
Di kovarê de hevpeyvîneke ligel Sezai Halifeoglu re hatiye kirin ku Aydin Rengîn ew ji tirkî wergerandiye kurdî.
Azad Dildar, Yusuf Atabay, Siyabend Aslan, Leyla Turhan, Fatma Zehra Gemi, Samed Dogan, Erdal Gul, Mehmet Ali Erol, Hoşeng Nizarî, Hataw Ahmed Sharif bi nivîsên xwe ked dane vê hejmarê.
Di dawiya kovarê de bi pirs û bersivan di hevpeyvîneke kurt de Medenî Ferho kirine mêvan.Di dawiya kovarê de "Ferhenga Termên Denûnnasyê" jî hatiye belavkirin.
Kovar niha amadehiya hejmara 19'an dike û di vê hejmarê de dê dosyaya wan li ser "Medya û derûnnasî" be ku yên bixwazin dikarin ji bo wan nivîsan bişînin.
Ji bo têkilî:
psychologykurdi@gmail.com