Diyarname
Kovara wêjeyî û çandî ya mehane Dîwar hejmara xwe ya yekemîn derxist. Di kovarê de nivîsên li ser hemû pirtûkên sala 2012'yan bûye mijara sereke. Her wiha nivîsên wêjeyî jî di kovarê de cih girtine.

Kovara Dîwar ku ev çend meh bû amadekariya wê dihat kirin hejmara xwe ya yekemîn derxist. Kovar ku Gerînendetiya Weşanê Helîm Yûsiv dike dê mehê carekê derê. Kovar zêdetir bala xwe dide ser abonetiyê û bi vê rêyê belav kirinê. Lê dê li hin cihên navendî yên li bajarên bakur û Stenbolê jî peyda bibe.

Li gor agahiyên rêveberên kovarê her mehê dê wekî dosyayê "Mijara sereke" ya kovarê hebe. Di vê hejmara pêşî de mijara sereke li ser pirtûkên 2012'yan hatiye amadekirin. Di vê çarçoveyê de Cemil Oguz lîsteya hemû pirtûkên bi kurdî yên li Tirkiye û bakur amade kiriye û weşandiye. Di nivîsê de yek bi yek pirtûkên ku sala 2012'yan derketine, cureyên pirtûkan û her wiha agahiyên li ser weşanxaneyan cih digirin. Dîsa pirtûkên li rojavayê Kurdistanê derketine jî di nivîsê de hatine bi cihkirin. Di çarçoveya Mijara Sereke de Çiya Mazî bi ser navê "Ji hostayê çîrokan du pirtûkên zarokan", Sîdar Jîr jî "Bi ferhengeke jinane nivîsandina sirûda Eldoradoyê" nivîsandiye.
Her wiha Helîm Yûsiv jî bi Besam Mistefa re li ser pirtûkên ku wî ji soranî ji bo kurmancî amade kirine, li ser xebatên wî hevpeyvîneke kiriye. Mistefa ku pirtûkan ji soranî ji bo kurmancî amade dike, di sala 2012'yan de bi vî rengî 7 pirtûkên ku wî amade kirine derketine. Hevpeyvîn li ser vê yekê hatiye rêstin.

Ji nivîsên wêjeyê Omer Dilsoz "Çîroka bapîrê min", Xoşman Qado "Dengbêjiya kurdî, wêje û nûjenî", Ciwan Qado jî "Pêjna jojiyê sersalê", Bedran Dere jî "Yezdan winda ye" nivîsiye. Her wiha Çêmen Elî li ser çanda "Girê Êlim", Îlhamî Sîdar jî "Roman Pêşangeha Çi ye?" nivîsiye.

Nivîskar Perwîzê Cîhanî jî nivîsa xwe bi navê "Dîwar di ferhenga kurdî de" amade kiriye.

Di kovarê de du nivîsên aktuel jî cih girtine. Ji wan Cemil Oguz bi sernavê "Ji Ahmed Guneştekîn gaveke girîng: Rûbirûbûn" nivîseke li ser pêşange Ahmet Guneştekin amade kiriye ku pêşangeh heta dawiya salê li Stenbolê li dar ketibû, 22'yê vê mehê li Enqereyê li dar dikeve û meha avrêlê jî diçe Hewlêrê.
Dîsa ji nivîsên aktuel Hesenê Dewrêş jî li ser pêşangeha Şener Ozmen "Sifer Tolerans" nivîsa xwe amade kiriye ku ev pêşangeh jî heta dawiya salê li Stenbolê li dar ketibû.

Kovarê biryar daye ku her meh dê portereyeke li ser nivîskarên kurd ên dijîn amade bike û biweşîne. Di hejmara pêşî de Malmîsanij cih digire. Yanê portreya yekemîn li ser Malmîsanij hatiye amadekirin.

Di vê hejmara kovarê de beşek kurtenûçeyên çardî, her wiha danasîna hin pirtûkan jî cih girtine ku her hejmarê de dê ev hebin.

Li gor rêveberiya kovarê dê kovar her serê mehê derê. Dîsa li gor agahiyên ku wan dane me dê di hejmara duyem de li ser rewş, pêşketina ziman û çanda rojavaya Kurdistanê ku niha hewldanên mezin hene mijara xwe ya sereke amade bikin.

Ji bo kesên bixwazin xwe bigihînin kovarê:
www.kovaradiwar.com
peywendi@kovaradiwar.com