Diyarname
Di hilbijartina Serokatiya Baroya Stenbolê de berendamê  Cumhuriyetçi Guç Birligi (Yekîtiya Hêza Komarparêzan) Umit Kocasakal bi ser ket. Va ne agahî û hin axaftinên di hilbjartina baroyê ne:

- 9 berendam hebûn. Berendaman berî dengdanê axaftinên xwe kirin.

'PEYVA TIRKIYEYÎBÛNÊ JI ATATURK TÊ'
- Serokê niha yê Baroya Stenbolê Îbrahîm Kaboglu bû. Di axaftina xwe de bersiva berendamên ku gotinên wî rexne dikirin da, "Yên ku pirtûkên min nexwendine û Ataturkparêziya min rexne dikin hene. Ez ne ew kes in nanî bifroşim nanfiroş. Ew Ataturkî ji bo werin ser kar wekî amûr bikar tînin."
Kaboglu li ser peyva "Tirkiyeyîbûn"ê jî wisa got, "Mustafa Kemal peyva Tirkiyeyîbûnê bi xwe nivîsandiye, di pêşnûmaya Teşkîlat-î Esasiyet de bikar aniye ku ev yek bûye bingeh ji bo Zagona Bingehîn a sala 1924'an. Di xalên 12, 13, 14 û 15'an de ji bo gelên vê derê peyva 'Tirkiyeyî bûn' bikar anî. Her çiqas ev peyv neketine nav Zagona Bingehîn a 1924'an jî ev peyv berhema Ataturk e, di Zagona Bingehîn a 1924'an de ku bandora Ataturk lê bûye de ji bo pênaseya hemwelatîbûnê peyva 'Turkiye halki' (Gelê Tirkiyeyê) an jî wekî 'Turkiye ahalisi' hatiye bikaranîn. Hevalno em hev rexne bikin, em kêmasiyên binîn ber rûyê hev, em hev rexne bikin lê bi merdî rexne bikin."

'4 XALÊN SEREKE YÊN ZAGONA BINGEHÎN NAYÊN GUHARTIN'
- Berendamê Serokatiya Baroyê Umit Kabasakal ku berê sê caran serokatiya baroyê kiribû, wisa axivîn: Baro wê bibe parêzvanê welatê unîter, her 4 xalên destpêkê yên Zagona Bingehîn dê neyên guhartin. Emê van biparêzin.

'EM BIRYARÊN WE NOT DIGIRIN'
Yek ji berendamên din ê ji bo serokatiya baroyê Profesorê Zagona Bingehîn parêzer Korkut Kanadoglu bû. Va ne çend gotinên wî:
- Tirkiye di nav hiqûqêk bê sîstematîk de, ji aliyê hikumetek otorîter, her bêje totalîter ve tê bi rê ve birin. Ez bang li hemû dadger û dozgeran dikim; Dadgerên li gor Zagona Bingehîn tevnagerin, dadgerên sulh cezayê yên bi kêfî însanan tewqîf dikin, em yek bi yek navên we not digirin. Em hemû biryarên we not digirin. Rapor dikin. Emê van ji bo raya giştî belav bikin û emê nebêjin daraz ne serbixwe ye û bi paş ve nekişin. Em ji van dadger û dozgeran re dibêjin ku ger hûn li gor zagonên tevnegerin, bi kêfî eziyet li parêzer û hemwelatiyan bikin û tiştek bi min nabe, ger hûn wisa difikirin, bizanibin ku dê her du destên me bi berstûka we bigirin."

NÎVÎ ZÊDETIR PARÊZER NEÇÛN DENG BIKARNEANÎN
- Ji bo hilbijartinê 172 sindoq hatin danîn.
- Li Baroyê 68 hezar û 469 berendam hene. Tenê 30 hezar û 36 deng hatin bikaranîn.
- Berendamê Cumhuriyetçi Guç Birligi (Yekîtiya Hêza Komarparêzan) Umit Kocasakal ku berê jî serokatiya baroyê kiribû bi 10 heza û 227 dengî bi ser ket. Piştî serketinê Kocasakal axivî. Pişgirên wî nîşaneya guran bilind kirin û diruşmên wekî "Ne mutlu Turkum diyene" (Çi bextewar e yê ku dibêje Ez Tirk im), "Em leşkerên Mistefa Kemal in", "Şehîd namirin, welat nayê parçekirin" bilind kirin. Alîgirên Kocasakal "Merşa Îzmîrê' û 'Merşa 10 Saliya Komarê' jî xwendin. Kocasakal wekî kesekî nijadparest tê nasîn. Berê dema Baroya Stenbolê bi kurdî jî daxuyanî belav kiribû, di bernameyekê de ev rexne kiribû û bi tundî dij derketibû.
- Serokê niha û berendamê "Degîşîm Îçîn Avukatlar Grubu" (Koma Parêzeran a Ji bo Guherînê) Îbrahîm Kaboglu ku parêzerên kurd jî piştgirî didan wî bi temamî 7 hezar û 22 deng girtin.

Berendamên din ev deng girtin:
- Atakan Adem Selanik: 3 hezar û 809 deng
- Hasan Kiliç: 3 bin hezar û 557 deng 
- Korkut Kanadoglu: 2 hezar û 543 deng
- Arife Gokkaya Dinç: hezar û  477 deng
- Salih Uçar: 713 deng 
- Gulbeyaz Karadeniz: deng 515 deng
- Metîn Uraçîn: 173 deng

KOCASAKAL KÎ YE?
Umit Kocasakal di sala 1966'an de wekî kurê bavek ji Sînopa Tirkiyeyê, dayikek ji Gumulcineya Bulgaristanê li Kolna Almanyayê hatiye dinê. Ew profesor e, dozgerê berê ye. Paşê malbat vedigere Tirkiyeyê. Ew Lîseya Galatasaray dixwînre, paşê Zanîngeha Hiqûqê ya Stenbolê temam dike.
Gelek salan wî di nav CHP'ê de kar kiriye, carek jibo Serokatiya CHP'3e bûye berendam (2018) lê bi ser neketiye. Di sala 2020'î de ji CHP'ê hatiye îxrackirin.
Kocasakal ku xeta neteweperest a tirk diparêze, berî bikeve nava siyasetê di salên 2010-12, 2012-14 û 2014-16'an de 3 caran ji bo Serokatiya Baroya Stenbolê hatibû hilbijartin. Niha carek din hat hilbijartin.