PERWER YAŞ - BRUKSEL 

Peyama Serokê Herêma Federal a Kurdistanê Mesûd Barzanî di 13’emîn Lijneya Giştî ya Kongreya Netewî ya Kurdistanê de hat xwendin.  Barzanî diyar kir ku divê her çar parçeyên Kurdistanê stretejiya hevpar zelal bikin û got: “Ji bo ku Tirkiye bigihîje serkeftinê divê Birêz Ocalan azad bibe.” 

Endamê Polîtburoyê yê YNK’ê Mele Bextiyar jî wiha got: “Divê kurd bi stratejiya hevpar tevbigerin."

Lijneya Giştî ya KNK’ê li Brukselê didome.  Ji çar parçeyên Kurdistanê nûnerên partî û rêxistinan tevlî bûn. Nêzî 100 delege û her wiha mîvan tevlî Lijneya Giştî bûn.

Destpêkê peyama Mesûd Barzanî hat xwendin. Peyama ku naveroja wê gelek girîng bû, eleqeyek mezin dît û ji alî nûnerê Barzanî Hêmîn Hewramî ve hat xwendin.

DI SEDSALA 21’Ê DE DÊ HÊVIYÊN KURDAn PÊK BÊN

Barzanî di peyama xwe de kesên tevlî lijneyê bûn silav kir û got: “Ez 13’emîn damezrandina KNK’ê pîroz dikim. Ji her kesî re serkeftinê dixwazim. Em niha piştî têkoşîneke mezin di demek nû de ne. Têkoşîna gelê kurd ya rewa ket konaxeke nû. Hêviya me pêşerojeke roniye. Gelê kurd pêvajoya înkarê li pey xwe hişt.  Sedsala 21’ê dê bibe sedsala kurdan. Di vê pevajoya krîtîk de pêwîstî bi xebateke hevpar heye. Ji bo vê jî divê em navên ku xebatên civakî dimeşînin yên rojava re xebatê bimeşînin. Bi taybet jî divê em li Ewropayê dostan qezenc bikin. Herêma me di nava geşedanên mezin de ye.  Li dora Kurdistanê tirsa kÛrbûna nakokiyan heye.  Divê em hemû li dijî vê tirsî amade bin. Rast e kurd ji her demê zêdetir bi siûd in. Lê wekî her tim li dijî kurdan xetere hene. Ji ber vê jî divê em ji her demê zêdetir bibin yek."

DIVÊ STRATEJIYA ME YA JI ŞÎDETÊ DÛR HEBE

Barzanî diyar kir ku divê stratejiyeke ji şîdetê dûr ya kurdan hebe û got: “Ya herî girîng  divê em peyama yekîtiyê bidin gelê herêmê. Divê em ji mafê rewa yê gelê xwe dest bernedin. Divê em li başûrê Kurdistanê kongreyek ava bikin. Divê hemû hêzên Kurdistanê bi vê kongreyê li djî geşdanan têbikoşe."

DIVÊ PEYMANA HEWLÊRÊ BÊ PARASTIN

Barzanî balkişand ser pêvajoya navbera PKK û hikumeta tirk û got: “Em ji bo vê pêvajoyê divê bixebitin. Ez bang dikim ku ev pêvajo bi aştiyê temam bibe. Ji ber ku aştî, diyalog û têkoşînek bê şîdet hêviyên kurdan dikare pêk bîne.  Ji ber vê divê Ocalan azad bibe û di Zagona Bingehîn a Tirkiyeyê de guherîn bêne kirin."

Mesûd Barzanî li ser rewşa rojavaya Kurdistanê jî sekinî û got: "Piştî qeyrana li Sûriyeyê  me hewl da em hêzên rojavayê Kurdistanê bînin ba hev.  Peymana Hewlêrê qezenceke neteweyî ye.  Divê her kes li gorî peymana Hewlêrê tevbigere û ji hev re alîkar be. Divê li hemberî hev rêbazên şîdetê bikarneyên. Em piştgiriyê didin hinek hewldanên hêzên rojhilatê Kurdistanê jî. Hêviya me ev e ku li vir jî doza kurd pêş bike."

LI SER NAVÊ YNK’Ê MELE BEXTIYAR AXIVÎ

Piştî peyama Barzanî, Polîtburoyê YNK’ê Mele Bextiyar axivî. Bextiyar diyar kir ku tovê aştiyê li Kurdistanê gihîştine û got: “Kurd pêvajoyek girîng dijîn. Yekîtiya me ji her demê zêdetir girîng e. Em kurd divê bi stratejiyek hevpar têbikoşin. Dijminên kurdan êdî hêza wan nîn e. Ocalan ev 14 sal in di zindanê de ye. Divê azadiya Ocalan bê.”