Stenbol

Her du wezîrên ku li ser navê HDP'ê di Hikumeta Hilbijartinê de cih girtibû îro piştî Civîna Lijneya Wezîran îstîfa kirin. Wezîr Ali Haydar Konca û Muslum Dogan piştî îstîfayê li Navenda Giştî ya HDP'ê civînek li dar xistin. Wezîran gotin ku ji bo pêşî li şer bigirin wan di Desteya Wezarîran de cih girtine û wiha dom kirin: "Lê di asta ku em hatine de em ji hikûmeta ku teşhîr bûye, rûpoşa wê ketiye, ji şer sûdê digire, goristanan bombebaran dike, mizgeft û cemxaneyan xira dike û dişewitîne vedikişin."

Wezîran dan zanîn ku di bi awayekî fiîlî xebat meşandinê de zehmetî dijîn, ji ber wê jî wan îstifa kirine. Alî Haydar Konca da zanîn ku hikumeta AKP'ê ku ev 13 sal in bi tena serê xwe desthilatdar bû di 7'ê pûşperê de di hilbijartinan de ji gel dersek mezin girtiye û wiha got: "Qesir û AKP piştî encama vê hilbijartinê têkçûnek ku tu car nayê jibîrkirin jiyane."

Konca di berdewama axaftina xwe de wiha got: "Wekî du wezîr, piştî ku me bi partiya xwe re hevdîtin kir me biryara îstîfayê da. Gelê me di refên têkoşînê de ji hilbijartina nû re amedekariyan dike. Di 7'ê pûşperê de ku me ew nekir Serokdewlet em ê di vê hilbijartinê de jî nekin Serokdewlet. Em ê di 1'ê sermawezê de desthilatdariyê ji AKP'ê bigirin."

Her du wezîr 26 rojan di hikumetê de man. Wan li ser kuştinên dawî wisa got: "Qesr û AKP'ê, welat û gelê me, polîs, leşker, gerîla, sivîl, jin zarok, extiyar bêyî navberê bixe hemû hemwelatiyên xistine nav xeleta xwînê. Me di civîna Lijneya Wezîran de ji Cizîrê bigire tiştên ku me dîtine qal kir."

Konca got ku konseptek ji rojên Rewşa Awarte xurtir xistine dewreyê."

Li ser pirsekê jî Konca wisa got: "Di Lijneya Wezîran de me sedema îstîfaya xwe bi kurtahî vegot. Davutoglu jî fikra xwe anî ziman, me sipasî kir û em derketin. Me sedema îstîfaya xwe bi awayekî zelal anî ziman, nîqaş çênebû. Ez ji Gimgimê me, ji ber ez di Lijneya Wezîran de me gelek telefon ji bo min hatin ku wan ez şermezar dikirim. Me gotibû di rewşek wisa de ewlehiya hilbijartinê nîn e. Min got, li Cizîrê Wezareta Karên Hundir û Walîtî nekarî qeyranê bi awayê baş bi rê ve bibin, ligel ku min xwest ez xwe bigihînim jî min nekarî xwe bigihînim wezaretê. Davutoglu li ser van tiştan nesekinî, qala xendekan filan kir."