Diyarname

Yekemîn car HDP'yiyek, bi gotinek din kurdekî ji tevgera Bakur bi navê Wekîla Serokê Meclisê, Meclisa Tirkiyeyê bi rê ve dibe. Mebûsa HDP'ê ya Stenbolê Pervin Buldan ku li ser navê Koma HDP'ê Wekî Cîgira Serokê Meclisa Tirkiyeyê hatibû hilbijartin yekemîn car meclis bi rê ve bir. Buldan rêveberiyek çawa derxist pêş?

Buldan berî dest bi rêveberinê bike axaftina destpêkê kir û got: "Axa welatê me kirine cihê kuştinê, cihê talanê. Welat kirin hepisxaneyek dorgirtî ku hema bibêje her kes girtiye, lê bi şert li derve dijî. Em hemû xirabiyên li vî welatî çêdibin berpirs in, em berpirsê hemû êşan in. Ji ber vê yekê barê vê parlemenê giran e û xwedî girîngiyek dîrokî ye."

Buldan got dema ew Meclisê bi rê ve bibe dê tu endam bi neheqiyê re rû bi rû nemîne, ji ber cudahiyên xwe dê rastî tacizê neyê, rastî astengikin û heqaretê neyê, ezê destûr nedim vê yekê."

Her wiha Buldan diyar kir ku bi taybetî ew dê li hemberî cudakirina cinsî, gotina mêrane û helwestên wisa qebûl neke û ji bo vê yekê jî xwest ku mebûs di xebatên parlemenê de bi hurmet, bi tehamul, li gor heqaniyetê û nezaketê tevbigerin."

Mebûsên HDP û CHP'ê ji bo axaftina Buldan li çepikan da.

Di danişîna pêşî de Mebûsê CHP'ê Sezgin Tanrikulu dema hat ber kursiyê got ew dê telefonê kesek ji Silopî bike û telefon kir, dengê telefonê da ber mîkrofonê. Li ser vê Buldan diyar kir ku di rêziknameya navxweyî ya meclisê de tiştek wisa nîn e, hişyarî da Tanrikulu (di meclisa Tirkiyeyê de hemû serokên meclisê hişyarina didin lê kes guh nade wan). Ji aliyê din ve mebûsên AKP û MHP'ê bi gotinan êrîşê Tanrikulu kir.