AMED 

Li gor rapora Şaxa ÎHD'ê ya Amedê, ldi navbera 16'ê gelawêja 2015'an û 10'ê rêbendana 2016'an li 19 navçeyên 7 bajaran 59 car qedexeya derketina kolanê hatiye îlan kirin û di dema qedexeyan de 170 welatî hatine qetilkirin, 145 kes jî birîndar bûne. Di raporê de hate destnîşan kir ku êdî ne tenê bajêr, mirovahî jî di bin dorpêçê de ye. 

Şaxa Komeleya Mafên Mirovan (ÎHD) a Amedê der barê qedexeya derketina kolanê ku hê jî li Sûr, Silopî û Cizîrê berdewam dike û binpêkirina mafên jiyanê û mafên mirovan ên di nav vê demê de hatine jiyîn, raporek amade kir. Rapor, bi civîna çapemeniyê pêşkêşî raya giştî hat kirin. Serokê ÎHD'ya Amedê Racî Bîlîcî, binpêkirinên mafan yek bi yek rêz kirin.

'Înfazên bê daraz tê kirin'

Bîlîcî got ku êdî li Kurdistanê hiqûqek cuda di meriyetê de ye û wiha berdewam kir: "Li hemberî deskeftiyên kurdan polîtîkayên îmhayê tê meşandin. Li cihên ku xwepêşandanên civakî hene, înfazên bê daraz tên kirin. Ev pêvajo wisa nameşe."

'Mirovahî di bin dorpêçê de ye'

Bîlîcî destnîşan kir ku rewş gihîştiye wê merhelê ku êdî ne bajar, mirovahî di bin dorpêçê de ye û banga "çalakiya lezgîn" ku berê li rêxistinên mafên mirovan ên navneteweyî kiribû dubare kir. 

Bîlîcî derbarê cenazeyên Îsa Oran û Mesut Sevîptek ên ku 23 roj in li Sûrê têne rawestandin jî agahî dan. Bîlîcî da zanîn ku duh dema wekî heyet çûne ku cenazeyan wergirin, rayedarên dewletê ji wan re gotiye "Destpêkê muhîmmatên li ser cenazeyan ji me re bînin."

'Li Nisêbînê qedexe fîîlî didome'

Bîlîcî bal kişand ser rewşa Nisêbînê jî û got ku tevî qedexeya derketina kolanê tune ye jî, qedexe bi awayek fîîlî berdewam dike û ev yek lê zêde kir: "Jiyana şêniyên navçeyê di bin xeterê de ye."

Bîlîcî bang li dewletê kir ku dest ji êrîşên tevkujiyê berde û dom kir: "Bila tecrîda li ser birêz Ocalan were rakirin. Bila vegerin dor maseya muzakereyê."

'DMME ku tedbîr negirt, şîrikê sûcan e'

Bîlîcî biryara DMME'yê ya der barê qedexeya derketina kolanê de jî rexne kir û wiha dawî li axaftina xwe anî: "Ji windahiyên can ji niha pê ve DMME jî berpirsyar e."

DÎHA