Diyarname

Li Almanyayê bi hatine ser kar a Hîtler re serdemeke nû, serdemek dijwar, serdemeke bi êş dest pê kir. Ew serdem çawa dest pê kir, ji kîjan kêliyan re derbas bû, kî dengê xwe derxist, yan dernexist? Û di encamê de Hîtlerê ku bû sedema mirina bi mîlyonan çawa bi hilbijartinê hat ser kar? Mezinê şanoya dinyayê Bertolt Brecht li ser vê serdemê lîstika "Tirsa Fuhrer" nivîsandibû. Lîstika ku heta niha li gelek zimanan hatibû wergerandin û lîstin vê carê li kurdî hat wergerandin û ji aliyê lîstikvanên Teatra Jiyana Nû (TJN) ya NÇM'ê (Navenda Çanda Mezopotamyayê) ve hat lîstin.

Lîstikvanên TJN'ê di bin derhêneriya Metîn Boran de ev bi mehan e li ser lîstikê amadehî dikirin û di dawiyê de lîstik êvara 2'yê mehê li Şanogeha Ali Poyrazoglu promiyera xwe kir. Di şeva gelek mêvan lê amade bûn de lîstikvanan bi awayekî serketî lîstika xwe pêşkêş kirin. 

Derhêner Metin Boran ku heta niha derhêneriya gelek lîstikan kiriye ji aliyê kurdî ve jî pêşî di sala 2003'yan de li Amedê derhêneriya lîstika "Taziye" kiribû û ev duyemîn lîstika bi kurdî ye ku derhênirya wê dike.

Di wergerê de bêhna tirkî, di hin lîstikvanan de jî kêmasî hebû. Her wiha ji bo kesên bi kurdî nizanin jornivîsa bi tirkî hebû lê jornivîs di dema xwe de nedihat. Ligel her tiştî lîstika "Tirsa Fuhrer" ku li gor serdema niha ya Tirkiyeyê jî hêjayî temaşekirinê ye. TJN ku ev bi ser 20 salane re xebata xwe ya şanoyê didomîne lîstikek din a hêja pêşkêşî temaşevanên kurdî kir. Lîstik di dema pêşiya me dê li hin cihên din jî bê lîstin.

Kunye:

Nav: Tirsa Fuhrer

Test: Bertolt Brecht

Derhêner: Metîn Boran

Werger: Mehmet Çakmak

Lîstikvan: Rugeş Kirici, Cabbar Alp, Sakîna Jîr, Yasemîn Karadag, Menal Fahrî Acar, Cîhad Ekîncî, Apo Tayboga