Diyarname

Li dinyayê di zanîngehên mezin de bêhejmar beş hene û gel di wan beşan de, di avahiyên herî modern, pêşketin û mezin de dixwînin. Helbet kurd hê ne di wê astê de ne, lê kurd jî li ser wê rêyê ne. Kurd jî li bajarên xwe zanîngehan ava dikin, beşan têde vedikin û xwendevanan bi zimanê xwe didin xwendin. Mînaka îro ku niha bûye mijara me ji Efrînê tê.

Zanîngeha Efrînê di 26'ê tîrmeha 2015'an de bi 3 beşan dest bi perwerdehiyê kir ku ev beş ev bûn: Beşa Endazyariya Elektrîkê, Wêjeya Kurdî û Beşa Îktîsadî. Zanîngehê îsal 3 beşên din, beşên doktorî, ragihandin û endazyariya çandiniyê li beşên xwe zêde kirin û serdema nû dest pê kir. Di 26'ê meha borî de ezmûnek li dar xist, û di encamê de 250 jê guncan hatin dîtin û ew li 6 beşan hatin belavkirin.

Zanîngehê ji aliyê fîzîkî ve jî hin dirustkirin çêkirine, kursî û maseyên xwe nû kirine, pirtûkxane û salon nû kirine û amûrên nû temîn kirine.

Endamê Lijneya Rêveberiyê yê Zanîngehê Ehmet Yûsif wisa gotiye: "Zanîngeha Efrînê li Rojava yekemîn zanîngehe ku hatiye vekirin. Vekirina zanîngehê li herêmê ji aliyê akademîk ve bûye gavek girîng. Emê bikin ku gavên girîngtir biavêjin û emê kêmasiyên xwe temam bikin."

Ji ber van xebatên wan em dîmena zanîngehê wekî Wêneyê Rojê ligel van agahiyan pêşkêşî we dikin.