Cemil Oguz

Lîstika şanoyê "Mala Bernarda Alba" lîstikek helbestvan û nivîskarê spanyolî Garcia Lorca ye. Lîstika ku heta niha bi gelek zimanî hatiye lîstin niha Teatra Nûjen wê lîstikê bi kurdî, li Wanê derdixe pêşberî şanohezan.

Lîstikvan hemû jin in

Derhêneriya lîstikê Nazmi Karaman dike û bi temamî 10 jinên endam3en Teatra Nûjen têde rol digirin. Bernarda jinek xurt û kevneperest e û mêrê wê nû miriye. Ew ji bo heşt salan şîn radigihîne û deriyên mala xwe ji bo dinyaya derve digire. Ew ligel diya xwe ya pîr, xizmetkara wê, cîgira wê û pênc keçên xwe dijî. Ew dixwaze mala xwe bi zordarî û li gor daxwazên xwe bi rê ve bibe lê keça wê ya herî biçûk Adela serî hil dide. Rewş wan ber bi encamek trajîk ve dibe.

Nivîskar û helbestvanê spanyolî Federico Garcia Lorca berî bimire bi 2 mehan nivîsandina lîstika xwe temam dike, lê piştî mirina wî, encax di sala 1945'an de yekemîn car derdikeve ser dikê. Lîstik heta niha ji bo gelek zimanî hatiye wergerandin û bi wan zimanan derxistine ser dikê. Niha jî ji bo kurdî hate wergerandin û bi kurdî roja 12'yê mehê li Wanê derdikeve ser dikê.

Eleqeya jinan ji bo şanoyê

Heta niha hin lîstikên klasîkên dinyayê bi kurdî bûne şano ku Mala Bernarda Alba jî yek ji wan e û mînaka dawî ye. Di lîstikê de hemû lîstikvan jin in, dinya li dor wan digere. Ji nav gelek lîstikên klasîk hilbijartina lîstikek wisa tercihek balkêş e.  Li ser hilbijartina vê lîstikê derhênerê lîstikê Nazmi Karaman ji bo me van yekan tîne ziman: "Di serdema dîrokê de jin her dem bûne qurban. Hemû jiyan li ser wan hatiye sazkirin, bi wî awayî şikil dane jiyanê. Di lîstikê de jin hene. Li Wanê jî jin gelek eleqeyê şanoyê didin, ji ber vê yekê min xwest lîstikek ku derdê wan bi xwe tîne ziman ez derxim ser dikê."

'Jinên kurd jî dê xwe di lîstikê de bibînin'

Li gor gotina Karaman ev sê meh in projayê dikin û di vê demê de gelek ked dane. Li gor Karaman jinên kurd dê eleqe nîşanî lîstikê bidin û wisa dibêje, "Lîstika Mala Bernarda Alba lîstikek gerdûnî ye, lîstik nîşan dide ku jin çawa dibin qurbanê toreyan. Lîstik di heman demê de bi awayekî qala jinên kurd jî dike, yanê jinên kurd jî dikarin xwe têde bibînin."

Ligel ew qas jinan di lîstikê de kar kirin rê li ber derhêner Nazmi Karaman jî vekiriye û li ser vê yekê jî ew dibêje ku ew bi xwe jî gelek tişt ji jinan hîn bûye, cîhana hundirîn a wan baştir fêm kiriye û van gotinan lê zêde dike: "Jin çawa ku di nav jiyanê de pêşeng in di nav hunerê de jî pêşeng in; bi dîtina vê yekê ez gelek kêfxweş bûm."

Lîstik roja 12'ê mehê saet 17.00 û 19.30 de du caran dê bê lîstin û ji bo kesên bi kurdî nizanin jî jornivîsa bi tirkî hatiye amadekirin.

KUNYEYA LÎSTIKÊ:

Nivîskar: Federico Garcia Lorca

Derhêner: Nazmi Kahraman

Werger: Firat Kaya

Cil û berg, dekor: Evin Yildirim Oztunç

Muzîk: Kemal Yildirim

Asîstanên Rejiyê: Îlayda Şengol, Perînaz Aydogdu

Lîstikvan: Îlayda Şengol, Nazli Îsmaîlî, Bêrîvan Budakbeyoglu, Perînaz Aydogdu, Dîlan Kiziltaş, Eda Bartu, Elîf Enteroglu, Necla Îçen, Asmîn Açar, Fatma Selen

Dem: 90 deqîqe, yek perde

Dema lîstinê: 12.04.2017, Seans yek: 17.00, seans du: 19.30

Cih: Şanoya Dewletê ya Wanê

Lîstikvanên Teatra Nûjen li Wanê 12'yê mehê lîstikê pêşkêş dikin.