Zinarê Xamo

Zekî Ozmen di malpera "diyarnameyê" de li ser ger û seyaheta xwe ya Îsraîl û Filistînê nivîseke kin lê înformatîf û pir xweş nivîsiye.

Ozmen, di nivîsa xwe da bi kinî qala çavdêrî û muşahedeyên xwe, qala tiştên bi çavên xwe dîne kiriye. Zêde neketiye teferûatan lê dîsa jî çend tiştên bakêş gotine.

Em kurdên bakur li ser Îsraîl, li ser mafên filistîniyan yên li Îsraîl hema hema qet tiştekî nizanin, tirk û filistînî çi didin me, em wê wekî rastiyeke mitleq qebûl dikin û dikirin.

Lê belê ev înformasyoneke yekalî ye, piraniya wê propagande û dezînformasyona li dijî cihûyan û Îsraîl e.

Zekî Ozmen di vê nivîsa xwe ya kin de hin agahiyên kurdên bakur nizanin daye. Mesela gotiye:

"Îsraîl welatekî sêzimanî ye. Di meriyetê de (yanî di qanûnan da, di praktîkê da) ev yek rûniştiye. Lewheyên trafîkê, nivîsên agahdarkirin û hişyariyê hemû bi hibrî, erebî û îngilîzî ne. Ji min re gelekî balkêş bû ku ji hişyariyên li ser cixareyan bigirin heta agahdariyên derbarê parqkirinê de jî bi sê zimanan bûn. Dibistan jî bi erebî û hibrî ne.”

Lê kurdên me yên dîndar û îslamîst dîsa jî ji Tirkiya hebûna kurdan qebûl nake bêtir li dijî Îsraîl in.

Çimkî Îsraîl nas nakin, nizanin filistînî li Îsraîl xwedî çi maf in.

Lema jî pir rehet ji ereb û filistîniyan bêtir dibin neyarên Îsraîl û cihûyan.

Ancax ji sedî 1-2'yê kurdên bakur ji van tiştên Zekî Ozmen di nivîsa xwe de qal kiriye haydar in, ji sedî 98, 99 bêhay in.

Lema jî ji filistîniyan bêtir neyartiya Îsraîlê dikin.

Îsraîl welatekî 3 zimanî ye.

Lê tirk di meclisa xwe de ji bo zimanê kurdî dibêjin "filan kes bi zîmanekî nayê fêm kirin peyivî."

Li Tirkiyeyê kurd hîn ji ber navê Kurdistanê dikevin hepsê. Hîn nikanin tîşortekî bi nivîsa Kurdistanê li xwe bikin.

Kurdek hîn nikane ji tirkekî re bibêjie ez ji Kurdistanê me.

Lê li Îsraîl zimanê erebî resmî ye. Di meclîsa Îsraîlê de partiyên filistînî hene.

Lê li Tirkiyê kurd hîn nikanin li her derê bi hev re bi kurdî bipeyivin.

Kurd li Tirkiyê hîn nikanin li her derê, di trênê, di otobusê de bi telefonê bi kurdî li halê dê û bavên xwe bipirsin.

Lê kurdên dîndar û îslamîst dîsa jî ji Tirkiyê bêtir li dijî Îsraîla sêzimanî ne.

Wexta we hebe nivîsa Zekî Ozmen bixwînin, hûnê hin rastiyên we nizanîbûn fêr bibin.
**

Ji bloga Zinarê Xamo hatiye girtin