Diyarname
Îro li bajarê Silêmariyê Şêwra Yekîtiya Neteweyî dest pê kir. Şêwra ku pêşengiya wê KNK'ê (Kongreya Neteweyî ya Kurdistanê) dikir sibê jî dê bidome. Axaftina destpêkê ya şêwrê ji aliyê Hevserokê KNK'ê Rêbiwar Reşîd ve hate kirin.
Di rûniştina yekem de, nûnerên YNK, Tevgera Goran, Partiya Komela Îslamî, Partiya Yekgirtû Îslamî, KCK, Tevgera Îslamî, PYD, Komele Komunîsta ya Îran, Partiya Komunîstî Kurdistan, Partiya Demokratîk a Kurdên Sûriye, Partiya Çep a Kurdên Sûriye, Kongreya Civaka Demokratîk (KCD), Saziya Malbatên Şehîdan a Rojava, Rêxistinên Jinan li gel gelek rewşenbîr, nivîskar, akademîsyen û rûspî mafê axaftinê girtin û axivîn.
Vane notên ji îro:

Hevserokê KNK'ê Rêbiwar Reşîd:
- Em hêvî dikin piştî guftûgoyên du rojan encamek baş em pêşkêşî gelê kurd bikin. Kongreya Netewî ya Kurdistanê dixwaze hemû rêxistinên siyasî yên Kurdistanê hevkariya xwe ji bo vê xebatê bidin nîşandan û li dijî siyaseta dagirker bisekinin. Em tev bi hev re dikarin Kongreya Netewî ya Kurdistanê bikin platformekî netewî, ji bo hemû meseleyên girîng yên ji bo siberoja Kurdistanê. Niha tişta herî pêwîst lidarxistina kongreya neteweyî ye.
Nabe ku Yekîtiya Neteweyî ji ber ne beşdarbûna hindek partî û rêxistinan were taloqkirin. 
KNK di wê baweriyê de ye ku hejmara partiyên siyasî ne pirsgirêk e, dikare bibe diyardeyeke siyasî ya baş jî.
Em tev bi hev re dikarin Kongreya Neteweyî ya Kurdistanê bikin platformekî neteweyî, ji bo hemû meseleyên girîng yên ji bo siberoja Kurdistanê. Ji bo civakeke aram û tendurist pêwîst e mafên demokratîk, mafên jinan, mafê çînan, mafên xizmetgûzariyên giştî werin bidestxistin. Em bi vî awayî dikarin sîstemekî konfederalîzma demokratîk ya Kurdistanê pêş bixin ku ereb, faris, gelê tirk û belûcî cîranên me jî bên nava rêzên Kurdistanê û ji bo pêkanîna herêmeke bi îstîqrar û aram bixebitin.

Hevseroka PYD'ê Asya Ebdullah (li ser navê partî û saziyên Rojava axivî):
- Berî her tiştî ez li ber şehîdên azadiyê kemberbest dibim. Hemû berxwedêrên li her çar parçeyan silav dikim. Li goristanên şehîdan ên Rojava yekîtiya neteweyî pêk hatiye. Ev goristan ji me re dibêjin yekîtiyê pêk bînin. Gelê me yekîtî pêk aniye. Êdî dora partî û rêxistinên siyasî ye. Divê em vî tiştî ji xwe bipirsin, çi tişt e yekîtiya me ya neteweyî asteng dike?
Tehdîdên li ser Efrînê didomin. Li Bakur, Başûr, Rojava divê em bi giyanekî hevpar li hemberî êrîşan têbikoşin. Em bawer dikim ev komxebat ji bo pêkanîna Yekîtiya Neteweyî wê gaveke mezin be.

Endama Dîwana KCD'ê Mulkiye Bîrtane:
- Pêwistiya gelê kurd û Kurdistanê bi statû û rêxistinbûyînê heye. Êdî gelê me ji rewşa civakeke bêrêxistinî derketiye, di Rojhilata Navîn de bûye hêza herî pêşeng, bi bandor û rêxistinkirî. Ji ber ku berê yekîıtî û rêxistineke hevpar a kurdan nebû nekarîn mêtîngeriya li Kurdistanê têk bibin.
Ev komxebata me derfeteke herî baş ya ji bo yekîtiyê ye. Siyaseta bila biçûk be, lê ya min be her tim bi gelê me dide windakirin. Referandûma serxwebûna herêma Kurdistanê di warê erênî û neyînî de wê bandoreke mezin bike. Divê pirsgirêkên navxweyî di vir de werin çareserkirin."

Endamê Dîplomasiya KCK’ê Serhed Varto:
- Yekîtiya Netewî, ji bo pirsgirêka kurd bi awayekî yekpare û bi rêyên siyasî-demokratîk were çareserkirin pêwîst û ferz e.
Divê kurd teqez yekîtiya xwe saz bikin. Divê prensîb û xalên esasî yên Yekîtiya Neteweyî werin nîqaşkirin.
Pir şaş e ku pirsgirêkên di navbera hindek partiyên siyasî de li pêşiya yekîtiya neteweyî asteng werin dîtin. Li dewsa ku em pirsgirêkan wekî astengiyeke li pêşiya Yekîtiya Neteweyî bibînin, Yekîtiya Netewî û Kongreya Netewî wekî platformeke çareseriyê ya hemû pirsgirêkên xwe dîtin, wê nêzîkatiyeke hîn rasttir be.
Divê xebatên Yekîtiya Netewîey bi nîqaşên komxebata KNK'ê re bi sînor nebin, derbasî asteke jortir bibin û têde prensîb û xalên esasî yên Yekîtiya Neteweyî werin nîqaşkirin.
Divê were zanîn ku tiştê ku ji bo kurdan xeter û metirsîdar e, di heman demê de di nava xwe de derfetên azadiyê jî ji bo kurdan pêşkêş dike. Ev jî rastiyek e. Ji lewma di navenda şer de cih girtin, ji bo kurd û Kurdistanê helwest û sekneke stratejîk jî dide qezenc kirin. Eger ev rol û sekna kurdan baş were nirxandin, wê ji bo kurdan azadî, ji bo Rojhilata Navîn jî demokrasiyê bîne.

Ji Tevgera Goran Aras Welî:
- Niha gelê kurd ji her demê bêhtir bi hêztir e û tevahiya çapemeniya cihanê bi balkêşî temaşeyê gelê kurd dike. Berxwedana gelê kurd a salên 1991 li Başûrê Kurdistanê wisa kir ku civaka navnetewî maf bide gelê me. Niha destkeftiyên gelê kurd li Başûr û Rojavayê Kurdistanê bûye cihê baldariyê ji bo tevahî cîhanê, bi taybet di aliyê rêxistinbûyîna jinan de bala cihanê kişaye ser xwe.
Yekîtiya Netewî ji bo pêşketina hêza gelê kurd li her çar parçeyên Kurdistanê pêwîstiyek e û niha li Rojavayê Kurdistanê pêwîst e bi alîkariya madî û manewî heye. Divê niha alîkariyek zêdetir ji bo wê were kirin.
Ji bo Başûr pêwîst e dewleta serbixwe armanca wê hebe, ne xewn û xiyalî be. Divê hizbek wekî diruşm û daxwazên xwe yên siyasî vê bikar neyne. Her wiha ji bo dewamkirina desthilatdariya xwe bikar neyne.”

Endama Konseya Rêveber a Komelên Jinên Kurdistanê (KJK) Besê Erzîncan:
- Eger em gelê kurd yekîtiya xwe saz nekin emê rû bi rûyê metirsiyên mezin werin. Ji ber em ne yekgirtîbûn bi hezaran jinên êzidî ketin destê DAIŞ’ê.

Rêxistinên Rojhilat:
- Hevserokê Partiya Jiyana Azad a Kurdistanê PJAK’ê Siyamend Moînî bi navê PJAK û KODAR peyameke hevbeş pêşkêş kir û got: “Divê hemû alî erkên xwe yên dîrokî bilîzin û ji bo pêkhatina Kongreya Neteweyî jî gavên pratîkî werin avêtin. Gelê Kurdistanê daxwaza azadiyê dike û ji bo pêkhatina vê jî amade ye. Divê partî berjwendiyên xwe yên hizbî û aborî nedin pêş berjwendiyên neteweyî û fersendên dîrokî ji dest nedin.”

Mebûsê HDP'ê Nadir Yildirim:
- Li her derê zext û zilm li gelê kurd tê kirin lê, dewleta Tirk li Bakurê Kurdistanê faşîzmê pêktîne.
Niha Rojhilata Navîn navenda hemû nakokî û aloziyane. Birêz Abdullah Ocalan dibêje, projeya min ya herî mezin yekîtiya Kurdistanê ye û em jî wekî HDP vê ji xwe re esas digirin. Divê em kurd pirsgirêkên xwe tev bi diyalog û nîqaşê çareser bikin. Divê em ne çar parçe, yekparçe bin. Emê teqez serbikevin.
**

Nûçeya eleqedar:

- KNK: Komxebata yekîtiya netewî li dar dixe