Tûrhan Gunay û Weşanên Ewrenselê wê Xelata Voltairê bistînin ku ji hêla Yekîtiya Weşangerên Navdewletî (IPA) ve tê dayîn.

Yekîtiyê eşkere kir ku ew ê xelatê bidin rojnameger û weşanger Tûrhan Gunay ê piştî 268 rojan girtî ma û paşê serbest hat berdan û Weşanên Evrenselê ku di nava 30 weşanên di encama KHK'yê (Biryarnameya di Hukmê Zagonê de) de hatibûn girtin de bû.

IPA vê xelatê dide wan weşangeran ku bi helwestên xwe yên wêrek ên di qada azadiya weşangeriyê de kar dikin.

Îsal her wiha Azadeh Pasapour e-weşanger a Îranî ku li Londonê dijî û pirtûkên nivîskarên qedexekirî çap dike, Moe Way nivîskar, helbestvan û weşanger ê Bûrmayî, Kim Jeong-ae romanûs, rojnameger û weşangerê ji Koreya Bakûr û Gui Minhai weşangerê Swedî jî ji bo xelatê weke namzet hatibûn nîşandan.

Cara pêşîn e ku didin 2 kesan

Komîteya Azadiya Weşangeriyê ya IPA'yê ku namzetan û kesên xelatan distînin diyar dikin, destnîşan kirin ku di dîroka 11 salan a vê xelatê de cara pêşîn e ku didin du kesan. Hat diyar kirin ku ev biryar li hemberî çewisandina hemû dengên rexnegir ji hêla hikumeta Tirkiyeyê ve yên di hemû ciyên jiyana çandî, akademî û medyayê de wekî berteka IPA'yê derketiye holê.

Xelat di 29'ê rezbera 2017'an de li Pêşangeha Pirtûkan a Goteborgê wê bê dayin.

Turhan Gunay kî ye?

Ew zêdetirî 30 salan e ku li rojnameya Cumhuriyetê kar dike. Berpirsê weşanê yê Paşkoya Pirtûkê ya Cumhuriyetê û rêveberiya Pirtûkên Cûmhûriyetê ye.

Tevlî 10 hevalên xwe bi sûcê “ne endamê rêxistina terorê ye lê alîkariya rêxistina terorê kiriye” di 5'ê sermaweza 2016'an de hat girtin. Di daneşîna ku di navbera 24 û 27'ê tîrmeha 2017'an de di encama biryara demkî de di 28'ê tîrmehê de serbest ma, sûcdariyên derbarê wî de didomin.

Weşanên Evrenselê

Di sala 1988'an de hat avakirin. Bi sedama berhemên ku bi tirkî, kurdî, ermenî, suryanî û erebî weşandiye wekî weşanxaneyeke pirzimanî tevkariya dewlemendiya çandî û edebî kiriye.

Di 29'ê kewçêra 2016'an de di encama Biryarnameya di Hukmê Zagonê (KHK) ya hejmar 675'an de xebatên wê bi awayekî fiîli hatin sekinandin û ji bo ku bê girtin zor dane wê.

Wekî 30'emîn weşana ku di encama KHK'yê de hat girtin di dîroka Tirkiyeyê de cih girt.

Ji BÎANET'ê hatiye girtin