Diyarname
12 kes radibin li hemberî 12 hezaran leşkerên Îranê radibin. Şerek dijwar diqewime û ji me re jî destana vê çîrokê dimîne.

"Donzdeh Siwariyên Merîwanê" a Pîremêrd, bi amadekariya Memê Mala Hine ji Weşanê Peywendê derket. Pîremêrd bi nivîs û çalalakiyên xwe kedek mezin daye cîhana wêjeya kurdî. Di vê berhemê de jî destaneke dîrokî ya kurdan bibîr dixe, lehengiya 12 şervanên kurd ên li hemberî artêşa Îranê rabûne derdixe pêş. 12 kes dikarin artêşek têk bibin? Belê di destanê de ev 12 kes artêşa Îranê ya bi 12 hezar kesî têk dibin.
Farangîs Ghaderî ku pêşek ji bo destanê nivîsiye wisa gotiye: “Donzdeh Siwariyên Merîwanê ne tenê berhemeke wejeyî ye ku ji çîrokeke neteweyî hatiye girtin. Ew, bi neqişandineke hosteyî ya hişmendiyeke neteweyî û telqînkirina neteweperweriyê di nav gelê kurd de, hewldanên rewşenbîrên kurd ên neteweperwer yên wekî Pîremêrd nîşan dide. Ev berhem hêjayî xebatên akademîk û lêkolînê ye.”
Em nota dawî jî lê bikin û xwendina destanê ji bo xwendevanan bihêlin: Ev dastana ku ji aliyê Pîremêrd ve hatiye berhevkirin û amadekirin yekem car di sala 1935'an de, cara diduyan di sala 1959'an de û cara sisêyan di sala 1983'yan de li Silêmaniyê hatiye çapkirin. Ev her sê çap bi tîpên erebî bûne ku niha ev destan bi tîpên latînî jî li ber destên xwendevanan in.

- Donzdeh Siwariyên Merîwanê / Pîremêrd / Amadekar: Memê Mala Hine / Weşanê Peywend / 2017