Diyarname
Rojnameya bi ermenkî Jamanak di çarçoveya çalakiyên sed saliya xwe de paneleke li dar xist û pêşangehek vekir.
Çalakiya Jamanakê li Tutun Deposuya Stenbolê li dar ket. Di bin moderatoriya sernivîskarê rojnameya Jamanakê Ara Koçuyan de bi beşdariya xwediyê rojnameya "Armenian Abzervian" Oshin Keshishan (li Los Angelasê weşanê dike), Gerînendeyê Weşanê yê kovara "Express" Cristian Makarian (li Fransayê weşanê dike), rojnameger Hifzi Topuz û Ragip Duran paneleke bi sernavê "Dîroka Çapemeniya Ermen û Jamanak" li dar ket.
Di panelê de rojnameger Topuz qala têkiliya xwe û zarokên ermenî ya di zarokatiya xwe de kir, dûre di çapemeniyê de qala xwe û hevaltiya xwe ya bi rojnamegerên ermen re kir. Hifzi Topuz da zanîn ku di navbera wan de tu demê cudatî tunebûye. Hivzi Topuz li ser dîroka çapemeniya ermen jî agahî pêşkêş kir û wisa got: "Yekem çapxaneya ermenan di sala 1576'an de li Sêwasê hatiye avakirin. Çapemeniya ermen di serdema Osmanî de ciheke gelek girîng digire. Di sala 1794'an de yekem rojnameya ermen li Hindistanê dest bi weşanê kiriye. Li dewleta Osmanî di serdema Abdulmecîd de, di sala 1839'an de yekem rojnameya ermen derketiye. Li Stenbolê 350 rojname, kovar û weşanên mîzahî yên bi ermenkî derdiketin, her wiha li bajarên Anadoliyê jî weşanên bi ermenkî derdiketin."

Prof. Oshin Keshishan jî da zanîn ku li Hindistanê komeke biçûk a ermenan hebû û wan yekem  rojname derxist. Wê çaxê 15 rojname derdiketin. Keshishan da zanîn ku li Amerîkayê yekem car di sala 1887'an de weşana bi ermenkî derketiye û bi giştî di dîroka çapemeniya ermen de heta niha 4500 rojname û kovar hatine weşandin.
Keshishan li ser rojnameya Jamanakê jî da zanîn ku rojnameyeke 100 sal li dû xwe hişbite, ji bo vê enerjiyeke mezin lazim e û dûre diyar kir ku Jamanak di weşana xwe de rastiya pêşkêş dike.

Christian Makarian jî li ser çapemeniya ermen a li Fransayê kir û got ku piştî koçê li Fransayê çapemeniya ermen di sala 1920'an de derketiye holê.

Rojnameger Ragip Duran jî da zanîn ku dîroka Jamanakê dîroka 100 salan a Tirkiyeyê ye û wiha berdewam kir: "Di sala 1910'an de tenê li Stenbolê bi 26 zimanên cihê weşan dihat kirin. Ev nîşan dide ku çiqas qûlên Osmanî zêde bûne. Di serdema me de, niha min mêze kir li New Yorkê tenê bi 10 zimanan weşan têne kirin. Îro min li zimanê çapemeniya li Stenbolê mêze kir tenê bi 7 zimanan weşan têne kirin. Yanê me 19 ziman têk birine. Wisa bifikirin 26 darên me hebûn lê niha tenê 7 darên me mane."
Duran got ku bi saya Jamanakê em xwe baştir nas dikin.

Piştî panelê pêşangeha li ser dîroka Jamanakê hate vekirin. Di pêşangehê de wêreyên ji rûpelên Jamanakê ku her yek bi xwe dîrokekê ye, wêneyên nivîskarên Jamanakê yên berê û niha, li ser weşana Jamanakê ji dîrokê heta niha, her wiha wêneyên çapemeniya Ermen cih digirin.
Pêşangeh heta 21'ê mehê her roj di navbera saetên 11 û 19.00'an vekiriye.