Diyarname

Îro li Samsunê Hevserokê berê yê DTP'ê Ahmet Turk rastî êrîşeke hat. Gelek saziyan êrîş şermezar kir. Serokwezîr Erdogan li Turk geriya.

Piştî êrîşa li hemberî Ahmet Turk a li Samsurê ji gelek cihan peyamên şermezarkirinê hatin weşandin. Ji bo Turk wê rêxistinên bajar û navçeyên BDP'ê çalakiyan li dar bixin.

Serokwezîr li Turk geriya

Serokwezîrê Tirkiyeyê Recep Tayyîp Erdoxan, bi telefonê li Ehmed Turk geriya, daxwaza şîfayê jêre xwest û ragihand ji nêzîk ve bûyerê dişopîne.

Recep Tayîb Erdoganê li paytexta DYA'ye Washingtonê, têkildarî êrîşa ku li Samsunê li hember Ehmed Turk pêk hatî, bi telefonê li Turk gerîya û şîfa jêre xwest. Erdogan diyar kir ji nêzik ve bûyerê dişopîne. Turk jî ji ber vê dilnizmiya Erdogan sipasiyên xwe pêşkêşkir.

KNK: Êrîşa li Turk plankirî ye

Kongreya Neteweyî ya Kurdistanê (KNK) li ser êrîşa li hemberî Turk peyameke weşand û got: "Bi xemgîniyeke mezin me bihîst ku êrîşeke bi alçaxî li hemberî Turk li Samsunê pêkhatiye. Êrîşa li Ahmet Turk di bingeha xwe de li gelê kurd û têkoşîna wê hatiye kirin."

KNK'ê got ku ji ber ku di bin çavdêriya polîsan de êrîş hatiye kirin û piştî bûyerê ji bo ew neyê nasîn çavên êrîşkar hatine girtin bi ya me bûyer ji berê de hatiye plankirin.

KNK'ê ji bo Turk sersaxî xwest û diyar kir ku gelê kurd û saziyê wê dê têkoşina xwe ya bidomînin.

14 baroyan êrîş şermerzar kir

Baroyên Amed, Mûş, Şirnex, Culemêrg, Çewlig, Semsûr, Mêrdîn, Sêrt, Batman, Wan, Agirî, Bedlîs, Qers û Îdirê bi daxuyaniyeke êrîşa li hemberî Turk şermezar kirin û xwestin yên êrîşkar bêne eşkerekirin.

Baroyan di daxuyaniya xwe de gotin ku digel berê jî li Samsunê bûyerên bi vî rengî pêk hatine, bûyera du cerdevanan ku li Kopê du kes kuştin dîsa jî şandine Samsunê û ev yek mirovan dide fikirandin.

Di daxuyaniyê de hate gotin ku her kes piştî lênêrîna nasnameyan digirin edliyeyê û ev yek lê zêde kirin: "Ewlehiya ku hatiye girtin li hemberî kî û çawa hatiye girtin? Ewlehiya ku nikare malbatên muştekî, parêzerên ku karê xwe dikin û mebûsan biparêze li hemberî kî ewlehiyê digire?"

Baroyan xwestin doz dîsa vegerînin Mûşê û kesên êrîş kirine û ew şandine êrîşê bêne darizandin.

Rêxistinên BDP'ê çalakî dikin

BDP'ê bi awayekî tund êrîşa li dijî Hevserokê DTP'a hate girtin ê qedexeya siyasî liser Ahmet Turk a li Semsûnê şermezar kir. Cîgirê Hevserokê BDP'ê Nîhat Ograş, diyar kir ku êrîşa li dijî Ahmet Turk, êrîşek bi wate û giran e û wiha got: "Divê ev êrîş ji rêzê neyê dîtin. Di serî de DTP girtin. Piştre qedexeyên siyasî danîn ser parlementeran. Niha jî êrîşî Turk kirin. Gelo dê sibê çawa bibe?"

Ograş, destnişan kir ku êrîşa li dijî Turk pêk hatî, li dijî hemû gelê Kurd pêk hatiye û wiha got: "Ev vê êrîşê wekî êrîşek li dijî gelê Kurd pêk hatiye qebûl dikin. Turk rûmeta gelê kurd e. Li dijî vê rûmetê êrîş pêk hatiye. Em vê yekê şermezar dikin. Ji ber vê êrîşê rûmeta hemû gelê kurd êşiya ye. Em hemû gelê xwe û rêxistinên xwe yên navçe û bajaran dawetî çalakiyên li dijî vê êrîşê dikin."

Ograş, destnîşa kir ku wê sibê li hemberî êrîşê li hemû bajar û navçeyan çalakiyan lidarbixin û bang kir ku hemû kes tevli van çalakiyan bibin.

Ograş, diyar kir ku Hevserokê BDP'ê Selahattîn Demîrtaş, wê têkildarî bûyerê daxwuyaniyek berfireh bide. Ograş, xwest Waliyê Samsunê jî ji peywirê bê girtin.

***

Nûçeya eleqedar:

- Êrîşê Ahmed Turk kirin