Diyarname

Bi navê "Çîroka Biwêjan" pirtûkek derket ku ev hê cîlda yekemîn a pirtûkê ye. Pirtûka ku dê şeş cîld be di cîlda yekem de 79 çîrokên biwêjan tê pêşkêş kirin.

Nivîskar û lêkolîner Mustafa Borak xebata xwe ya lêkolîn û nirxandinê pêşkêşî raya kurdî kir. Pirtûka ku bi navê "Çîroka Biwêjan" hatiye amade kirin bi cîlda xwe ya yekemîn ji Weşanên J&J'yê derket. Cîldê din jî dê peyder pey bêne weşandin.

Li gor gotina Mustafa Borak ev xebat encama bîst û pênc salan e û piştî vê cildî dê cîldên din jî bên ku teqrîben dê wekî şeş cîld bêne çapkirin.

Di vê cildê de 79 çîrokên biêjan hene ku ji van pênc jê gotinên pêşiyan in lê ji ber ku ew jî ji aliyê naverok û peyama wan ve ketine nava ev çîrokên biwêjan.

Borak li ser naveroka çîrokên biwêjan, tesîra wan û derketina wan a holê jî van dibêje: "Di çîrokên biwêjan de hêza afirandina gel a ku bi domana sed salan de bi awayekî hevkarî û kolektîf pêk hatiye heye. Ji ber vê jî encamek xurt derdikeve pêş. Di van çîrokan de mîr, şah, axa, paşa, gundî, jin, mêr, cure cure heywan geh bi awayekî qerfî, carina jî bi awayê komîk, carina jî bi awayê rexneyî, carinan jî bi awayekî trajîk rista xwe dilîzin. Nakokî û dubendiyên di navbera eşîr û gelên cîran de û yên di navbera dîn û mezheban de di van çîrokan de bi awayekî zelal tên ziman. Di van çîrokan de duristî û sextekarî, gêjî û bîjî, xayînî û mêranî, saftî û dilxiltî, doxînsistî û tolazî, xweşbînî û rexbînî, û her wekî wê gelek mijar bi awayekî ku di mêjiyê mirov de baş cî bigire hatine neqişandin. Di çîrokên biwêjan de bi gelemperî biwêj di hevoka çîrokê ya dawî de cî digire û bi derblêdanekê peyamê dide xuyandin."

Nivîskar Borak ji bo hêviya xwendevanan a pirtûkê jî van gotinan tîne ziman: "Ez hêvî dikim dema ku mirov pêlên vê pirtûkê vekin, wekî deriyê dîwana şevbihurkê vekin, bikevin nav tunela çand û giyanê gelê kurd û bikevin nav germahiya çand, kelepor û rihê kurdewariyê. Hêvî dikim ku sewta dengbêj û çîrokbêjan di kerika guhê xwe de hîs bikin."

Mustafa Borak kî ye?

Borak di sala 1956'an de li Qulpa girêdayî bajarê Îdiriyê hatiye dinê. Wî di sala 1993'yan de li Navenda Çanda Mezopotamyayê (NÇM) ya Îzmîrê cih girtiye. Li wir bi taybetî li ser perwerdehiya zarok û ciwanan sekiniye. Wî di sala 2005'an de di nav TZPKurdî de cih girtiye, paşê jî heta komeleya Kurdî-Der ji aliyê dewletê ve hatiye girtin têde kar kiriye. Heta niha 4 pirtûkên wî derketine.

Vane pirtûkên wî yên ku heta niha derketine:

- Gotinên Pêşiyên Kurdan, Weşanên Berfîn, 1996, Stenbol

- Ferhenga Biwêjan, Enstîtuya Kurdî ya Stenbolê, 2005, Stenbol

- Gevez, Weşanxaneya Aramê, 2017, Amed

- Çîrokên Biwêjan, Cîlda 1, Weşanên J&J, 2018, Amed

- Çîrokên Biwêjan (Cîlda 1) / Mustafa Borak / Weşanên J&J, 345 rûpel / 2018, Amed