Diyarname
Prof. Dr. Bakir Çaglar ku piştî bûyera li Cizîra Şirnexê gotibû "Ez poşman bûm ku min parêzeriya dewletê kir" îro jiyana xwe ji dest da.

Prof. Dr. Bakir Çaglar li Zanîngeha Stenbolê hîndekarî kiribû û malnişîn bûbû ku di heman demê de hiqûqnasê Zagona Bingehîn bû jiyana xwe ji dest da.

Çaglar piştî ku Lîseya Saint Joseph û Zankoya Hiqûqê ya Stenbolê xwend çû Sorbonneya Fransayê û du doktora kir.

Prof. Çaglar ku demekê şêwirmendê hiqûqê ya Dadgeha Zagona Bingehîn bû şeş salan li Strasburgê, di Dadgeha Mafên Mirovan a Ewropayê (DMME) de parêzeriya dewleta Tirkiyeyê kir.

Dema li gundê Cizîrê bi fermana sûbayê dewletê Cafer Tayyar Çaglayan leşkeran gû bi gundiyan da xwarin komek dadgerên DMME'yê ji Strasbûrgê hatin û li gund lêkolîn kirin. Prof. Çaglar jî li ser navê Tirkiyeyê wekî parêzerê Tirkiyeyê bi wan re bû. Piştî vegera ji Cizîrê Çaglar di hevpeyvîneke xwe de gotibû: "Ez çûm Şirnexê jiyana min guherî. Dema ez vegeriyam êdî ez ne heman însan bûm. Ji aliyê rihî ve ez seqet bûbûm, ez poşman bûm ku min parêzeriya dewletê kiriye. Tirkiye dê li Strasbûrgê di hemû dozan de têk here."

Foto: ŞAHAN NUHOGLU