Diyarname
Çend roj berê me nûçeya "Malperên kurdan nûçeyên şaş diweşînin!"* weşandibû, vê carê em balê dikişînen ser nûçeyeke din ku dîsa malperan nûçeyeke şaş weşandiye. Vacarê yên ku nûçeya şaş weşandine AKnews û Nûkurd in.

Pêşî ew nûçe:

"Qedexe li ser fîlmên Yilmaz Guney rabû

Li Tirkiyeyê, 11 fîlmên lîstikvan û derhênerê navdarê kurd Yilmaz Guney, ku heta niha li Tirkiyeyê qedexe bûn, ji aliyê wezareta çandê ve hatin nûkirin û dê wek DVD bên weşandin.

Li gorî nûçeya rojnameya Hurriyetê, li ser fermana Wezîrê Çandê Ertugrul Gunay, fîlmên bi navê “Arkadaş-Heval”, “Umut-Hêvî”, “Aç Kurtlar-Gurên Birçî”, “Duvar-Dîwar”, “Seyithan-Seyîyxan”, “Agit-Hewarî” û “Zavallilar-Belengaz”, ku senaryoyên wan ji aliyê Yilmaz Guney ve hatiye nivîsandin û bixwe jî derhêneriya wan kiriye û her wiha, fîlmên “Yol-Rê”, “Duşman-Dijmin”, “Suru-Kerî” û “Endîşe-Fikar”, dê wek DVD bên weşandin.

Midûrê Giştî yê Sînema û Mafên Telîfê Çelik, diyar kir, salek e li ser vê projeyê kar dikin û wiha axivî, “Ev fîlm hatin paqijkirin û bo cara yekê ketin arşîva Wezareta Çandê. Wezaretê, di warê madî û menevî de, alîkarî kir.”

Hevjîna Yilmaz Guney Fatoş Guney jî, derbarê vê projeyê de wiha axivî, “Karekî baş e. Berê, tenê me 4 fîlm kiribû DVD. Formatên wan, VCD bûn. Ez ji ber vê, pir spasiya Wezareta Çandê dikim. Ev fîlm, fîlmê Yilmaz bixwe ne, ji ber piştî derbeya 12ê Îlonê, gelek fîlmên wî hatin şewitandin.”

Yilmaz Guney, navê wî yê rastî Yilmaz Putun bû û sala 1937ê li gundê Yenice yê Edeneyê ji dayik bû. Guney, nêzîkî 12 salan ket zîndanê û sala 1981ê, reviya Ewropa û li paytexta Fransa Parîsê bû penaber.
Derhêner û lîstikvanê navdarê kurd Yilmaz Guney, sala 1984ê, li Parîsê, çû ser dilovaniya xwedê."

Niha jî rastiyên li ser nûçeyên:

- Nûçe di 11.08.2011'an de di rojnameya Hurriyetê de hatiye weşandin. Aknewsê nûçe ji wir girtiye û di nûçeyê de gotiye ku ji Hurriyetê hatiye girtin, lê Nûkurdê ne gotiye ji Hurriyetê ne jî gotiye ji cihek din hatiye girtin.

- Aknewsê jî Nûkurdê jî sernavê "Qedexe li ser fîlmên Yilmaz Guney rabû" bikar anîne, lê tu qedexe li ser fîlmên Yilmaz Guney ji xwe tune bû. Heta niha fîlmên Yilmaz Guney li Tirkiyeyê wekî VCD hatine çapkirin û niha jî ew wekî DVD têne çapkirin. Heta salên 90'î qedexeyeke li ser fîlmên Yilmaz Guney hebû lê wê demê ew qedexe rabû. Fîlmê "Yol" ku derhêneriya wî Şerif Goren kiriye lê wekî filmê Goren û Yilmaz Guney tê hesibandin di 12.02.1999'an de li Tirkiyeyê ket vîzyonê.
Jixwe dema bi baldarî nûçeya ku Hurriyetê weşandiye jî baş bê xwendin (yan jî wergera ku van weşanan kiriye) dê bê dîtin ku dibêje 'Fartomanê VCD bûn'. Yanê tu qedexe li ser Guney tune bû û her du malperan jî rastî berevajî kiriye.
- Hurriyetê sernavê "Yilmaz Guney açilimi" (Pêşîlêvekirina Yilmaz Gurey) bikar anî bû, jixwe ev jî şaş e û jixwe rêya li ber Guney ne girtî bû.

Erê em fêm dikin Hurriyet û hin rojnameyên din dikarin bi her nûçeyê xwe pesnê hikumeta AKP'ê bidin, lê çi bi malperên kurdan hatiye? Bi ser de jî agahiyên şaş diweşînin...

Wekî agahiyeke din: Heta niha fîlmên Yilmaz Guney wekî VCD ji aliyê Weqfa Çand û Hunerê ya Yilmaz Guney û Gala Fîlm ve hatibûn çapkirin. Dibe ku niha ji bo çapkirina DVD'yên fîlmên Yilmaz Guney wezareta Çandê ya Tirkiyeyê alîkarî kiribe, lê ji bo paqijkirin û restorekirina fîlma Hikumeta Başûr ku wê demê di bin Serokatiya Nêçîrvan Barzanî de bû alîkarî da weqfê ku fîlmên Yilmaz Guney bêne restorekirin. Em mîktara alîkariyê nizanin lê em dizanin ku bi wê alîkariyê Weqfê fîlmên Guney şandin Îngilistanê û li wê derê restore kirin.

Em çi bibêjin: Bi hêviya ku dê malperên kurdan êdî nûçeyên rast biweşînin.

* Malperên kurdan nûçeyên şaş diweşînin!