Diyarname

Xelatên Festîvala Kozaya Zêrîn hatin belavkirin. Di şevê de fîlmê Onur Unlu ‘Celal Tan ve Ailesinin Aşiri Acikli Hikayesi’ Xelata Fîlmê Herî Serketî girt. Fîlmê Ozcan Alper ‘Gelecek Uzun Surer’ jî di 5 waran de xelat girt û mohra xwe li şevê da.

18’emîn Festîvala Kozaya Zêrîn ku li Edeneyê ji aliyê Şaredariya Edeneyê ve tê organîzekirin êvara 24'ê mehê bi merasima xelatdayînê bi dawî bû. Di şevê de ‘Celal Tan ve Ailesinin Aşiri Acikli Hikayesi’ wekî fîlmê herî serketî hat hilbijartin, derhêner Cemil Agacikoglu (derhênerê fîlmê Eylul) jî wekî derhênerê herî serketî hat hilbijartin. Piştî van xelatan du xelatên girîng ên festîvalê Xelata Yilmaz Guney û Xelata SİYAD’ê jî dan derhêner Ozcan Alper. Fîlmê Alper ‘Gelecek Uzun Surer’ ku li Amedê hatiye kişandin û li ser kurdên ji aliyê JÎTEM’ê ve hatine windakirin hatiye kişandin bi giştî 5 xelat girt.

Di şevê de peyamên aştiyê jî derketin pêş. Derhêner Ozcan Alper di dema xelatgirtinê de got, “Ez vî fîlmî diyarî ew kesên ku xizmên wan ji aliyê JÎTEM’ê ve hatine windakirin, wan ji bo careke ew êş neyê kişandin, bi êşkişandinê beşdarî kişandina fîlmê min bû dikim.” 

Muzîkar Mustafa Biber jî dema Xelata Muzîka Herî Serketî (Bi muzîka Gelecek Uzun Surer) girt got: “Ez ji bo her kesî, ji bo dinyayê hezkirin, hizûr û aştiyê hêvî dikim.”

Derhênerê dîmenê yê heman fîlmî Feza Çaldiran jî ku Xelata Derhênerê Dîmenê yê Herî Serketî girt wisa got: “Ez bi hêviya dê pêşeroja me dirêj bidome, bi vê xeyalê û bi hev re jiyînê ez vê xelatê digirim.”

Serlistikvanê heman fîlmî Durukan Ordu jî ev tişt anîn ziman: “Bi hêviya ku dê li welatê me bi tu zimanî, li tu bajarî lawij neyên xwendin”

Derhênerê fîlmê “Sîmûrg” Ruhi Karadag jî piştî Xelata Temaşevanên Edeneyê girt ev tişt anî  ziman: “Min li vî bajarî rojnamegerî kir. Ez vê xelatê ji bo rojnamegerên hatine kuştin û hatine windakirin, bi taybetî ji bo Musa Anter digirim.”

Digel van derhêner û serokê juriyê Derviş Zaim jî li ser navê juriyê Xelata Juriyê da fîlmê “Aşk ve Devrim” lê li ser navê juriyê, ji bo mirov bi paşeroja xwe re rû bi rû bibe bal kişand ser aliyên serketî yên ev filmên li ser kurdan, li ser komkuriyên wekî Mereş û Çorumê hatine kişandin û pesnê wan da.

Di şevê de ev xelat hatin belavkirin:

- Fîlmê Herî Serketî: 
Celal Tan ve Ailesinin Aşiri Acikli Hikayesi (Der: Onur Unlu)

- Xelata Yilmaz Guney: 
Gelecek Uzun Surer (Der: Ozcan Alper)

- Xelata Fîlmê Herî Serketî yê SİYAD’ê: 
Gelecek Uzun Surer (Der: Ozcan Alper)

- Xelata Temaşevanên Edeneyê: 
Simurg (Der: Ruhi Karadag)

- Xelata Taybet a Juriyê: Aşk ve Devrim

- Derhênerê Herî Serketî:  Cemil Agacikoglu (Eylul)

- Senaryoya Herî Serketî: Onur Unlu (Celal Tan ve Ailesinin Aşiri Acikli Hikayesi)

- Lîstikvana Herî Serketî: Hatice Aslan (Bi rola di Vucut de),
Gorkem Yeltan (Bi rola di Eylul de)

- Listikvanê Herî Serketî: Durukan Ordu (Bi rola di Gelecek Uzun Surer de)

- Derhênerê Dîmenê yê Herî Serketî: 
Feza Çaldiran (Gelecek Uzun Surer)

- Lîstikvana Duyemîn a Herî Serketî: 
Şeyla Halis (Bi rola di Vucut de)

- Lîstikvanê Duyemîn ê Herî Serketî: 
Tuna Orhan (Bi rola di Memleket Meselesi de)

- Xelata Taybet a Festîvalê: 
Dan hemû lîstikvanên fîlmê Celal Tan ve Ailesinin Aşiri Acikli Hikayesi

- Vesazkirina Herî Serketî: 
Taner Sarf (Eylul)

- Dengsazkirina Herî Serketî:
Burak Topalakçi (Kaybedenler Kulubu/Eylul)

- Derhênerê Hunerê yê Herî Serketî: Adali Aksoy (Aşk ve Devrim)

- Muzîka Herî Serketî: Mustafa Biber (Gelecek Uzun Sürer)

- Lîstikvana ku hêviyê dide: 
Deniz Denker (Aşk ve Devrim)

- Lîstikvanê ku hêviyhe dide Gun Koper (Aşk ve Devrim), 
Hakan Kurtaş (Vucut)