Diyarname

Roja 18.06.2021’ê 7’emîn Kongreya Rewşenbîrên Rojavayê Kurdistanê (HRRK) li bajarê Qamişlo lidarket. Kongre ji ber rewşa koronayê çend caran hatibû lipaşxitin. Di kongreyê de Xelata Rûmetê dan nivîskarê me Helîm Yûsiv.

Kongreya HRRK’ê di bin sernavê “Serkanî û darên zeytûnê ziwa dibin, em vedigerin” li Salona Zana ya li Qamişloyê bi beşdariyeke berfireh li dar ket. Piştî kêlîkeke rawestandina li ser giyanê şehîdan û muzîkê, gotinên kesayet û dezgehên çandî û rewşenbîrî hatin pêşkêşkirin. Di kongreyê de hin gotin û pîrozbahiyên ku hatibûn şandin hatin xwendin. Di nav wan de gotina nivîskar Helîm Yûsiv jî hebû, ku wekî pîrozbahî û xatirxwestina ji HRRK hatibû xwendin. 

Di nav axaftinên hatin kirin de li ser navê kongreyê helbestvan Ehmed Huseynî behsa pêvajoya damezrandina HRRK kir. Huseynî qala rola nivîskar Helîm Yûsiv a ji destpêka 2004 û heta veguhestina navenda rêxistinê ji Ewropayê ber bi Rojava de (sala 2018) kir ku rola wî gelek  gelekî mezin bû. Ji ber vê rola wî wekî sipasî û rûmetdayînê Xelata Rûmetê dan Helîm Yûsiv. Ji ber Helîm Yûsiv li Ewropa bû li şûna wî, hevalê wî Mizgînê Gemo xelata wî wergirt. 

Di kongreyê de Serokê HRRK'ê yê niha Welîd Bekir jî axivî û got: “Ev cara sêyemîn e ku kongreya me li rojavayê Kurdistanê li dar dikeve. Ev cihê serfirazî û serbilindiyê ye. Bi rêya yekîtiyê em hewl didin zimanê kurdî bi pêş bixin.”

Bekir li ser helwesta wan a li hemberî êrîşên li dijî gelê kurd ên li Efrînê, Serêkaniyê û Girê Spî sekinî. Her wiha Bekir ji bo dema pêş jî wisa got: “Bi rêya vê kongreyê em armanc dikin zemîna xwe firehtir bikin da ku nûnertiya hêviyên gelê kurd bikin, helwestên xwe bikin yek û destkeftiyên ku bi saya şehîdan hatine bidestxistin, biparêzin.”

Piştî axaftinan kongre bi awayekî fermî û bi beşdariya 61 endaman berdewam kir. Di kongreyê de rêbaza hundirîn  û rewşa rêxistinî hatin gotûbêjkirin û di dawiyê de 13 endam ji bo komîteya kargêr hatin hilbijartin. Tê pêşbînîkirin ku di van rojên pêşiya me de ji nav wan 13 endamên birêvebir serok û cîgirê wî bêne hilbijartin. 

***

Em gotina nivîskarê malpera me Helîm Yûsiv ya ji bo pîrozbahiya kongreyê û xatirxwestina wî ya ji HRRK’ê diweşînin:

“Pîrozbahî û Xatirxwestin

Ji bo 7’emîn Kongreya Hevgirtina Rewşenbîrên Rojavayê Kurdistanê li Qamişlo 

Rêhevalên hêja,

Berî 17 salan, di rojeke mîna vê rojê de, komeke xemxurên çand û wêjeya kurdî ku li derveyî welêt dijiyan, em li hev civiyan û ji ber pêdiviyên qonaxê û wekî erkeke wijdanî û rewşenbîrî rêxistina HRRK li derve hatibû damezirandin. Xalên ku em gihandin hev berî her tiştî hin xewnbûn. 

Di serî de xewna ku ji hemû kurdên di qada nivîsandin û hunerê de, di qada rewşenbîrîyê de kar dikin, bên cem hev û di bin sîwaneke hevbeş de xebata xwe bikin. Xewna din jî ew bû, ku ne tenê li derveyî welêt, lê belê li hundirê welêt jî ev sîwan bê avakirin. Ji ber ku “her dar li ser koka xwe şîn tê” divabû navenda birêvebirina vî karî ne li derve, lê li hundirê welêt be. Xewna sêyem jî ew bû, gav bi gav wêje, huner û çanda kurdî bi giştî ber bi sazîbûnê ve here û armancên ku ji bo wê HRRK hatiye damezirandin, pêk bên. 

Carcaran bi xurtî û carcaran bi sistî ji bo yekem xewn bibe rastî karekî dûrûdirêj tev li hemû astengiyan hate kirin. Wisa jî bi veguhestina navendê re, bi hatina wê ya hundirê welêt re, duyem xewna me ya wê demê jî kete qonaxa pêkanînê. HRRK vegeriya welêt û em man li derve. Bê guman di pêkanîna vê xewnê de em bi giştî deyndarên keda wan leheng û qehremanan e yên ku rê li ber vê yekê vekirin. Ji nav rêzên me jî bi taybetî em deyndarên keda mezin ya hevkarê xwe Ehmed Huseynî ne. 

Di vê navberê re, hem ji ber mana min a li derveyî welêt û hem jî ji ber hin sedemên girêdayî rewşa min a taybet, ji bo min dem hatibû ku ez xatir ji we û ji HRRK, di çarçova karê rêxistinî de, bixwazim. Ev yek ji bo min ne gaveke hesan bû, nexasim ku ezê her û her HRRK wekî projeyeke xwe bibînim û berdewamiya wê, pêşveçûna wê, her wisa serkeftina wê, wê rê li ber pêkanîna hemû armancên me yên di qada rewşenbîrî û çanda kurdî de veke.

Lidarxistina vê kongreya îro jî gaveke din e li ser vê rê ya dirêj, rêya cihbicihkirina çanda dezgeh û saziyan li şûna çanda girûp û komikan. Hêviya min ew e, ku 7’emîn Kongreya HRRK serkeftî derbas bibe. Yeko yeko silav û hezkirina xwe ji we re pêşkêş dikim û serkeftinê ji kar û barê kongreyê dixwazim.

Helîm Yûsiv – Almanya – 18.06.2021”