Amed
700 rêxistinên sivîl ên civakî yên herêmê di komcivîna "Ji bo çareseriya pirsgirêka kurd gotina me heyê" de civiyan. Cigîrê Odeya Bazirganî û Pîşesaziyê ya Amedê (DTSO) Diyadîn Gezer li ser navê 700 rêxistinên sivîl û civakî axivî, bal kişand ser hevdîtinên Îmraliyê û Qendîlê. Gezer got ku ji ber hevdîtin û muzakere bi dawî bûn pevçûnan dest pê kir. Gezer, da zanîn ku ji bo çareseriya pirsgirêka kurd hê gotin bi dawî nebûne.

Endam û nûnerên 700 rêxistinên sivîl ên civakî yên herêmê li Amedê civiyan. Li ser bangê, endam û rêveberên Baroya Amedê, Komeleya Mafê Mirovan (ÎHD), MAZLUMDER, Weqfa Mafê Mirovan a Tirkiyeyê (TÎHV), Odeya Bazirganî û Pîşesaziyê a Amedê (DTSO), Komeleya Karsazên Pîşesaziya ya Herêma Rojhilatê Başûr (GUNSÎAD), Platforma Şaxên KESK'ê, Odeya Tabîban, Komeleya Sarmaşîkê, Odeya Muşavîrên Aborî, Nûnerê Turk Îş ya 7'emîn, Lijneya TMMOB'ê ya Bajêr, Komeleyên Hemwelatiyên Azad, Meclisa Aştiyê, Nûnerên DÎSK'ê yên Herêmê û Odeya Dermanfiroşan jî di nav de gelek kes li dijî operasyona KCK'ê ku di nav de gelek siyasetmedarên kurd hatin girtin, bi diruşmeya "Ji bo çareseriya pirsgirêka kurd gotinên me hene" civiyan.

Civîn li Salona Resêpsiyona Sumerparkê ya Amedê pêk hat. Li ser navê 700 rêxistinên sivîl û civakî Cigîrê Odeya Bazirganî û Pîşesaziye ye Amedê (DTSO) Diyadîn Gezer axaftina destpêkê kir. Gezer, diyar kir ku binçavkirin û girtinên demên dawî dibe, di nava cemaweriye de dibe sedema alozî û bertekan. Gezer, bi lêv kir ku di aliyê hêviyên çareseriyê de şkestinekê pêk bîne.

Gezer, destnîşan kir ku operasyonên girtinê yên li dijî siyasetmedarên kurd, endamên rêxistinên sivîl û demokratîk û platforma saziyên KCD'ê hedef digire û îlegalîze dike. Gezer, got ku mudaxaleya polîsan ya li dijî çalakiyan hemû zêmina demokratîkbûnê teng dike û wiha axivî: "Piştî hilbijartinên 12 pûşperê, muzakerê qut bûn. Astengkirina li pêş hevdîtinên bi Rêberê PKK'ê Abdullah Ocalan re û operasyonên leşkerî û siyasî li pêşiya pevajoya aştiyê dibe asteng."

Gezer diyar kir ku ev pevajoya pevçûnê wan dixe nava tirs û fikaran û wiha berdewam kir: "Em ditirsin ku Tirkiye vegere pevajoya salên 1990'an. Binçavkirin û girtina rewa û asayî nîşan didin. Ev demokrasiyê birîndar dike. Qutkirina muzakereyê û hevdîtinan, rê li pêş pevçûnan vekir. Polîtîkayên polîs û leşkeran ne çareserî ye. Ev polîtîka çareserkirina pirsgirêka kurd dirêj dike. Jiyana biratiyê birîndar dike. Em wekî saziyên aliyê demokrasî mafên mirovan bang dikin ku her kes li hemberî vê yekê bi hestiyar tevbigere. Em dibêjin ji bo çareseriya pirsirêka kurd gotina me heye."

Piştî axaftina Gezer komcivînê derî li çapemeniyê girt û dom kir. Sibê dê ji bo raya giştî daxuyaniya encamnameyê bê dayîn.